უვიზო მიმოსვლა არის დიდი საფრთხე - გოცირიძე პუტინის განცხადებაზე

პოლიტიკა - 19:31, 17 Dec, 2015

5603

რუსეთის პრეზიდენტის ვლადიმერ პუტინის მიერ დღეს გაკეთებულ განცხადებას, რომელიც სავიზო რეჟიმის შესაძლო გაუქმებისს ეხებოდა, საფრთხის შემცველს უწოდებს ექსპერტი დემურ გიორხელიძე.
გიორხელიძის თქმით, რუსეთი იძულებული ხდება ევროპის მიერ ვიზების ლიბერალიზაციის პოლიტიკას რაღაცით უპასუხოს.
ექსპერტი აცხადებს, რომ უვიზო მიმოსვლა არის დიდი საფრთხე.
"რუსეთი საქართველოს წინააღმდეგ პროპაგანდისტულ ომს აწარმოებს მომხრეების მობილიზების, ჩანერგილი მეხუთე კოლონის გააქტიურებისა და ეკონომიკური მექანიზმების ამოქმედების გზით.
პუტინმა გადაწყვიტა, რომ ეს პროცესი თვისობრივად ახალ საფეხურზე აიყვანოს და საქარველოსთან უვიზო მიმოსვლის რეჟიმი აამოქმედოს. ამას აქამდეც გააკეთებდა, რომ არა სირიაში და სხვა არასტაბილურ ქვეყნებში რუსეთიდან წასული მეომრების, მათ შორის საქართველოს მოქალაქეების უკან დაბრუნების საფრთხე. ახლა იძულებული ხდება ევროპის მიერ ვიზების ლიბერალიზაციის პოლიტიკას რაღაცით უპასუხოს.
პუტინის დღევანდელმა განცხადებამ ჩვენში საყოველთაო მოწონება დაიმსახურა. სინამდვილეში პოლიტიკოსებს არ უნდათ რუსეთში სამუშაოს შოვნით დაიმედებული ადამიანების განაწყენება. სიმართლე კი ის არის, რომ უვიზო მიმოსვლა არის დიდი საფრთხე.
ძნელია გაღებულ კარზე უარის თქმა, თუმცა ნუ გადავეშვებით თავქუდმოგლეჯილი. ნელ-ნელა ევროპა გახდება ჩვენთვის ისეთივე ახლობელი, როგორიც რუსეთი და სხვა საბჭოთა რესპუბლიკები იყო თავის დოზე. ახალგაზრდა თაობისათვის, რომელიც ენის ბარიერს დაძლევს, ეს საკმაოდ მალე მოხდება.
რუსეთის საბოლოო მიზანი არის საქართველოში მარიონეტული ხელისუფლების დასმა და მისი ყველა ქმედება აქეთკენაა მიმართული.

რუსეთის პრეზიდენტმა ვლადიმირ პუტინმა შემაჯამებელ, ყოველწლიურ პრესკონფერენციაზე, სადაც სხვადასხვა ქვეყნი ჟურნალისტებს ხვდება, რუსეთ-საქართველოს ურთიერთობის პერსპექტივაზეც ისაუბრა.

პუტინმა განაცხადა, რომ რუსეთ-საქართველოს ურთიერთობების გამწვავების მიზეზი რუსეთი არ ყოფილა და მზად არის, ეს ურთიერთობა აღადგინოს.

"რაც შეეხება საქართველოს ტერიტორიულ მთლიანობას, ეს პირველ რიგში ქართველი, აფხაზი და ოსი ხალხის საქმეა. ჩვენ ნებისმიერ გადაწყვეტილებას მივიღებთ" - განაცხადა პუტინმა.
მისი თქმით, მოსკოვი საქართველოს მოქმედი ხელისუფლებისგან "სიგნალებს ხედავს" და ამ სიგნალების მისაღებად მზად არის.

პუტინმა ასევე აღნიშნა, რომ ქართული ღვინის საექსპორტო მოცულობის 2/3 სწორედ რუსულ ბაზარზე გადის და ეკონომიკური კრიზისის მიუხედავად, ეს მოცულობა ზრდის მაღალ ტემპებს აჩვენებს.
"რაც შეეხება სავიზო რეჟიმს, ჩვენ ვფიქრობთ და ჩვენ მზად ვართ, სავიზო რეჟიმი გავაუქმოთ" - აღნიშნა რუსეთის პრეზიდენტმა.