პრეზიდენტის ადმინისტრაციამ ე.წ. შეწყალების საქმესთან დაკავშირებით პროკურატურის ორ წერილს უკვე უპასუხა

პოლიტიკა - 15:44, 17 Dec, 2015

1590

საქართველოს პრეზიდენტის ადმინისტრაციამ ე.წ. შეწყალების საქმესთან დაკავშირებით ორ წერილზე პროკურატურას პასუხი უკვე გადაუგზავნა.
ადმინისტრაციის განმარტებით, დანარჩენი წერილების დამუშავება მიმდინარეობს.

რამდენიმე დღის წინ საქართველოს მთავარმა პროკურატურამ შეწყალებასთან დაკავშირებული გარკვეული ინფორმაციის მიწოდების თხოვნით პრეზიდენტის ადმინისტრაციას მიმართა.

ცნობისთვის, შეწყალების კომისიის ყოფილი და მოქმედი თავმჯდომარეებმა სკანდალურ განცხადებები წინა კვირას გააკეთეს.

ალეკო ელისაშვილი აცხადებს, რომ მას ინტენსიურად უკავშირდებოდნენ ცალკეული პოლიტიკოსები და მისგან მოითხოვდნენ სარეკომენდაციო ნუსხაში იმ პატიმართა გვარების ჩასმას, რომლებიც შეწყალების კრიტერიუმებს არ აკმაყოფილებდნენ.

მისივე თქმით, მოგვიანებით მან შეიტყო, რომ აღნიშნულ პოლიტიკოსებს თანხა ჰქონდა კონკრეტული ოჯახებისგან აღებული.

კონკრეტული პოლიტიკოსების მხრიდან პატიმრების საქმეებით არაჯანსაღი დაინტერესებაზე საუბრობს კომისიის ამჟამინდელი ხელმძღვანელი ზვიად ქორიძეც. მისი თქმით, არის მცდელობა ყველა მეთოდით მიაწიონ იმას, რომ გამოყენებულ იქნას შეწყალების მექანიზმი ისეთ საქმეებზე, რომელზეც შეწყალების კომისიამ ვერ მიიღო დადებითი გადაწყვეტილება.

შეგახსენებთ, რომ შეწყალების კომისიის ყოფილი ხელმძღვანელის სკანდალური განცხადების შემდეგ, პროკურატურამ გამოძიება 339–ე პრიმა მუხლის მეორე ნაწილით დაიწყო. რაც "ზეგავლენით ვაჭრობას” გულისხმობს.