იუსტიციის უმაღლესი საბჭოს მდივანი ლევან მურუსიძე მოსამართლეების შერჩევის პროცესში ხელისუფლების და ოპოზიციის ჩაურევლობის აუცილებლობაზე საუბრობს.

როგორც დიპკორპუსის წარმომადგენლებთან შეხვედრაზე მურუსიძემ განაცხადა, კონკურსი მშვიდ ვითარებაში უნდა წარიმართოს. იგი სასამართლოს წინააღმდეგ ხელისუფლების და ოპოზიციის საეჭვო გაერთიანებაზეც საუბრობს და ამბობს, რომ არსებული ვითარება ხელს არ შეუწყობს იმას, რაც ბოლო წლებში სასამართლოს დამოუკიდებლობის კუთხით გაკეთდა.

„ხელისუფლების და ოპოზიციის მხრიდან საეჭვო გაერთიანება მოხდა სასამართლოს წინააღმდეგ... ყველა დაირაზმა. ამბობენ, რომ კონკრეტულ მოსამართლეს კონკრეტული საქმეები აქვს განხილული და მათ არ აქვთ კონკურსში მონაწილეობის უფლება. ეს კატეგორიულად და პრინციპულად მიუღებელია. ეს ხელს არ შეუწყობს იმას, რაც ბოლო წლებში სასამართლოს დამოუკიდებლობის მხრივ გაკეთდა. ჩემი ერთადერთი მოთხოვნაა, რომ მშვიდ ვითარებაში წარიმართოს კონკურსი. საბჭოს უნდა მიეცეს საშუალება, რომ ყოველგვარი ზეწოლის გარეშე გააკეთოს საკუთარი არჩევანი. ამაზე არ უნდა მოახდინოს გავლენა არც ხელისუფლებამ, არც ოპოზიციამ და არც არასამთავრობო სექტორმა", - განაცხადა მურუსიძემ.