სად წავიდა პროკურატურამდე მიტანილი მესიჯები - ელისაშვილი პრეზიდენტისგან დადასტურებას ელოდება

პოლიტიკა - 00:11, 16 Dec, 2015

4359

შეწყალების კომისიის ყოფილი ხელმძღვანელი ალეკო ელისაშვილი „შეწყალების სკანდალის“ შესახებ კიდევ ერთ კომენტარს აკეთებს. ბოლო დღეებში განვითარებულ მოვლენებთან დაკავშირებით ელისაშვილმა გადაცემა „არჩევანში“ ისაუბრა. ელისაშვილმა უარყო საპარლამენტო უმრავლესობის მხრიდან წამოსული ბრალდებები, რომ ის ნაციონალების თამაშს თამაშობს და განაცხადა, რომ ის პოლიტიკური თამაშის მონაწილე არაა და ის სახელმწიფოს წინააღმდეგ ბრძოლაში მარტოა. ამასთანავე ელისაშვილმა მთავარი პროკურატურა ფალსიფიცირებაში და პოლიტიკური დავალებების შესრულებაში დაადანაშაულა

„როგორ უნდა ვენდო პროკურატურას, რომელსაც ჩემი ხელით მივუტანე ტელეფონი, 7 საათის განმავლობაში ვიჯექი და ჩვენებას ვაძლევდი. პროკურორმა მე და გამომძიებელმა დავლუქეთ ჩემი ტელეფონი რომ გადაგზავნილიყო ექსპერტიზაზე, არის მესიჯები, რომელიც ვიზუალურად ჩანს, არის მესიჯები რომელიც ტელეფონის მეხსიერებაშია შენახული. ეს ტელეფონი სახლში მქონდა წელწად ნახევარი. ექსპერტიზის პასუხი ჩემთვის არ უცნობებიათ, სხვებმა დამირეკეს და მითხრეს პროკურატურის ამბები თუ იციო. ეს მესიჯები არის ერთი დეტალი ძალიან ბინძური დიდი საქმის. მესიჯში ის კი არ იყო ნათქვამი ჩვენ 200 ათასი დოლარი ავიღეთ და შენ ტუ არ გამოუშვებ თავს მოგაჭრით და ნაწლავებს გამოგაყრევინებთო, ასეთი რამ კი არ ეწერა, კატეგორიული მოთხოვნა იყო, რომ შენ მერამდენედ გვაიგნორებ და რატომ არ გაგაქ განსაკუთრებული წესით ეს განსახილველად. როგორც კი ეს მივიღე შევედი პრეზიდენტის ადმინისტრაციის უფროსთან, პრეზიდენტთან, ეს მესიჯი წავაკითხე ზვიად ქორიძესაც როცა საქმეები გადავაბარე . პროკურატურა გადაიქცა პოლიტიკურ მოთამაშედ, ჯერ პოლიტიკოსების საუბრიდან ჩემი ჩვენების ციტატები მესმის, მერე თქვეს რომ მესიჯები არ აღმოჩნდა.
მე მინდა ვთხოვო საქართველოს პრეზიდენტ გიორგი მარგველაშვილს, დაადასტუროს ან უარყოს წავაკითხე თუ არა ეს მესიჯები და გავაცანი თუ არა ჩემი ეჭვები. თუ მე მატყუარა და ცრუპენტელა ვარ პრეზიდენტმა დაადასტუროს, რადგან ის ამ საქმეში მიუკერძოებელია. მაშინ მე ვიტყვი რომ მატყუარა ვარ და პოლიტიკიდან კი არა ქვეყნიდანაც წავალ. მთელი სახელმწიფო ჩემი და ჩემი ტელეფონის წინააღმდეგ დაირაზმა. ის მესიჯებიც იქნება ნაჩვენები, არავის არაფერს არ შევარჩენ.“- განაცხადა ელისაშვილმა.

ალეკო ელისაშვილი არ გამორიცხავს, რომ მის წინააღმდეგ სისხლის სამართლის საქმეც აღიძრას და ციხეში ჩასვან. ელისაშვილი აცხადებს, რომ ის სიმართლეს ყველაფრის მიუხედავად მაინც დაამტკიცებს.

ელისაშვილის თქმით, გარემო პირობები აიძულებს რომ მან მედიას ამ საქმეში გარეული ადამიანების ვინაობა გაუმხილოს.
„ნუ გონიათ რომ რამით შემაშინებენ, მომისმინონ განსაკუთრებით სუს-ში, რაღაცეებს რომ აგროვებენ. ოცნებას ყოველთვის ვაღიზიანებდი, რადგან ნაციონალებისგან განსხვავებით ჩემს წინაღმდეგ არგუმენტები არ ქონდათ, ხან ამბობდნენ რომ პოპულისტი ვარ ხან დიდი ცხვირი მაქვს “- აღნიშნა ელისაშვილმა.