იუსტიციის უმაღლესი საბჭოს მდივანი ლევან მურუსიძე მიიჩნევს, რომ სულხან მოლაშვილთან დაკავშირებით უზენაეს სასამართლოში ყოფნის პერიოდში სამართლიანი გადაწყვეტილება მიიღო.

ამის შესახებ მურუსიძემ ჟურნალისტებთან საუბრისას განაცხადა.

რაც შეეხება მოლაშვილის წამების საქმეს, როგორც მურუსიძე ამბობს, მის მიერ განხილულ საქმეში წამება საერთოდ არ ფიგურირებდა.

"დღემდე ვინმემ იცის მოლაშვილი ვინ აწამა? დღემდე გამოძიება ჩატარებულა და ვინმემ იცის ვინ აწამა? ჩემთან სისხლის სამართლის საქმე შემოსული იყო კონკრეტული ბრალდებით, მე ვიხილავდი კონკრეტულ სისხლის სამართლის საქმეს, რომელშიც წამების თემა საერთოდ არ ფიგურირებდა. ახლაც დარწმუნებული ვარ გადაწყვეტილებაში, რომ იმ მუხლებში რაც წარდგენილი ჰქონდა მოლაშვილს, იყო დამნაშავე", - განაცხადა მურუსიძემ.