თუ რაგბისტთა წრეს, რაიმე ფორმით ჩრდილი მიადგება, ეს იქნება ძალიან დიდი ტრაგედია- უსუფაშვილი

პოლიტიკა - 15:07, 15 Dec, 2015

1363

საქართველოს პარლამენტის თავმჯდომარემ, დავით უსუფაშვილმა რაგბის ფედერაციის პრეზიდენტის არჩევნებთან დაკავშირებით კომენტარი გააკეთა. დავით უსუფაშვილის შეფასებით, თუ საქართველოში ერთ-ერთ ყველაზე წარმატებულ ფედერაციას რაიმე ფორმით ჩრდილი მიადგება, ეს ყველასთვის ტრაგედია იქნება.

„მინდა, ვთქვა ერთი რამ, რომ თუ ჩვენ, ყველა ერთად და ცალ-ცალკე, მე თუ ვინმე სხვა, მოვახერხებთ იმას, რომ საქართველოში ერთ-ერთ ყველაზე უფრო წარმატებულ კორპორაციას, რაგბის ფედერაციას და ზოგადად, რაგბისტთა წრეს, რაიმე ფორმით რაიმე ჩრდილი მიადგება, ეს იქნება ძალიან დიდი ტრაგედია არა მხოლოდ რაგბის სამყაროსთვის, არამედ ყველასთვის, იმიტომ, რომ ეს არის ის სფერო, რომელშიც გვაქვს ეროვნული მასშტაბის წარმატებები. ეს არის შედეგი ძალიან ბევრი ადამიანის თავდაუზოგავი შრომის, როგორც უშუალოდ, რაგბის სფეროში მოღვაწეების, ისე, სხვადასხვა ბიზნესმენების, მეცენატების, სახელმწიფოს და ამიტომ, ყველამ, ყველაფერი უნდა ვიღონოთ იმისთვის, რომ რაიმე ჩრდილი და ტალახი არ მოეცხოს ამ საქმეს“,- განაცხადა დავით უსუფაშვილმა. მისივე თქმით, მონაწილენი ერთმანეთს კონკურენციას გამჭვირვალე და სამართლიანი თამაშის წესებით უნდა უწევდნენ.საქართველოს პარლამენტის თავმჯდომარის შეფასებით არჩევნებში ღირსეული კანდიდატები მონაწილეობენ.

„მინდა, როგორმე, ჩვენ, ქართველები შევეგუოთ იმ ამბავს, რომ არჩევნების დროს არის ხოლმე გამარჯვებული და დამარცხებული. ამას თუ არ შევეგუეთ და თუ არ მოვახერხეთ ის, რომ სამართლიანი და გამჭვირვალე თამაშის წესებით ჩავებათ კონკურენციაში, მაშინ არც პოლიტიკაში გამოგვივა რამე და არც რაგბში. მე როგორც ვიცი, ძალიან ღირსეული კანდიდატები არიან ამ შემთხვევაში, კანდიდატები, მაგრამ თანამდებობა ერთია და მე მინდა ვისურვო, რომ იმ ადამიანებს, ვისაც აქვთ ხმის მიცემის უფლება, ექნებათ თავისუფალი ხმის მიცემის საშუალებაც და ვაღიაროთ ის შედეგები, რაც იქნება სამართლიანი, თავისუფალი არჩევნების ფონეზე მიღებული მათ მიერ“- აღნიშნა ჟურნალისტებთან საუბრისას საქართველოს პარლამენტის თავმჯდომარემ.