ბოჭორიშვილი არც ერთ ეტაპზე პოლიტპატიმრად არ ჩაგვითვლია- დავით უსუფაშვილი

პოლიტიკა - 12:39, 15 Dec, 2015

1599

საქართველოს პარლამენტის თავმჯდომარე ე.წ „კოკაინის საქმის“ ფიგურანტის ნუგზარ ბოჭორიშვილის შესახებ გავრცელებულ ინფორმაციას გამოეხმაურა. დავით უსუფაშვილის თქმით, ბოჭორიშვილს „რესპუბლიკურ პარტიასთან“ შეხება 2005-2008 წლებში ქონდა. ამასთანავე უსუფაშვილის განცხადებით „რესპუბლიკელები“ არც ერთ ეტაპზე ბოჭორიშვილს პოლიტპატიმრად არ მიიჩნევდნენ:

"ბოჭორიშვილთან დაკავშირებით მიმდინარეობს საკითხის გარკვევა. ამ თემაზე 2011-2012 წელს პარტიას ოფიციალურად მიმართა მანანა კობახიძემ, როგორც ბოჭორიშვილის ადვოკატმა და გვთხოვა მიგვეწოდებინა მისთვის ინფორმაცია, იყო თუ არა ბოჭორიშვილი აქტივისტი. ჩემი ხელმოწერილი წერილი არის გაცემული, რომ ის იყო პარტიის წევრი 2008 წლამდე და ასევე იხდიდა საწევროს, თუმცა სხვა რაიმე განსაკუთრებული აქტივობა მისი მხრიდან არ ფიქსირდებოდა. აქვე არის მეორე ეპიზოდი - 2012 წლის შემოდგომაზე, როცა პარლამენტი პოლიტიკური ნიშნით დევნილი პირების გათავისუფლების საკითხებზე მუშაობდა, მაშინ ბოჭორიშვილის გვარიც მოხვდა წინასწარ სიაში, თუმცა როგორც კი ჩვენ, ”რესპუბლიკელებს” ამ საკითხზე პოზიციის დაფიქსირება გვთხოვეს, ჩვენ განვაცხადეთ, რომ ბოჭორიშვილი არც ერთ ეტაპზე პოლიტპატიმრად არ ჩაგვითვლია და რომ მის მიმართ სახელმწფიოს მხრიდან განხორციელებული ზომები მის პოლიტიკურ საქმიანობას არ უკავშირდებოდა." - განაცხადა უსუფაშვილმა