სოფლის მეურნეობის მინისტრის ოთარ დანელიას თქმით, ვიზალიბერალიზაციის სამოქმედო გეგმის შესრულების ფარგლებში მისმა უწყებამ ყველა დავალებას გაართვა თავი.

როგორც დანელია ამბობს, სოფლის მეურნეობის სამინისტრო არის სავიზიტო ბარათი ევროკავშირში ინტეგრაციის ნაწილში.

„ყოველგვარი მოკრძალების გარეშე, შემიძლია გითხრათ, რომ სოფლის მეურნეობის სამინისტრო არის სავიზიტო ბარათი ევროკავშირში ინტეგრაციის ნაწილში, ვინაიდან დირექტივების ძალიან დიდი რაოდენობა მოდის სწორედ სოფლის მეურნეობის სამინისტროზე. ვფიქრობ, რომ ჯერჯერობით ძალიან წარმატებულად ვართმევთ თავს“, - აღნიშნა ოთარ დანელიამ.

დასკვნის გამოქვეყნება გუშინ უნდა მომხდარიყო, თუმცა ევროკომისიის გადაწყვეტილებით რამდენიმე დღით გადაიდო.

არაოფიციალური ინფორმაციით, ვიზა ლიბერალიზაციასთან დაკავშირებული ანგარიშის გამოქვეყნება 21-22 დეკემბრისთვის იგეგმება.