უსუფაშვილი ე.წ "მარჯვენასაჭიანი მანქანების" კანონპროექტთან დაკავშირებით საჯაროობას ითხოვს

პოლიტიკა - 18:08, 14 Dec, 2015

2940

პარლამენტმა მიიღო გადაწყვეტილება „საგზაო მოძრაობის შესახებ“ საქართველოს კანონში ცვლილების შეტანის თაობაზე“ კანონპროექტის განხილვის დაწყების შესახებ. გარდა იმისა, რომ ეს და მისი თანმდევი კანონპროექტები საგზაო მოძრაობის მოწესრიგებას ეხება, იგი ასევე ითვალისწინებს საქართველოში იმპორტირებული მარჯვენასაჭიანი და გადატანილსაჭიანი მსუბუქი ავტომობილებისა და ავტობუსების რეგისტრაციის დაუშვებლობას.

„შეგახსენებთ, რომ ეს არის კანონპროექტი, რომელმაც ჯერ კიდევ კანონპროექტად დაბადებამდე საკმაო ვნებათაღელვა გამოიწვია საზოგადოებაში. მსურს, კიდევ ერთხელ განვმარტო ის, რაც ჯერ კიდევ შინაგან საქმეთა სამინისტროს მხრიდან არაერთხელ ითქვა, რომ ამ კანონის მიღების შემდეგ იმ პირებს, რომლებიც აღნიშნული ავტომობილებით სარგებლობენ, არანაირი პრობლემები არ ექმნებათ. აქ ლაპარაკია იმაზე, რომ საქართველოში, ისე როგორც მსოფლიოს ყველა ნორმალურ ქვეყანაში, მოწესრიგდეს საგზაო მოძრაობის წესები, და ეს მოწესრიგება იყოს არა შოკისმომგვრელი, რაიმეს აკრძალვები, არამედ დროში გაწერილი იმისთვის, რომ ჩვენ სასურველი შედეგი მივიღოთ. პრობლემა ისაა, რომ თავის დროზე, ძალიან ბევრი წლის წინ, ეს საკითხი არ მოგვარდა და ახლა გვიწევს ამ თემებზე საუბარი“, - განაცხადა პარლამენტის თავმჯდომარემ.

მისი თქმით, პარლამენტი ამ საკითხს ძალიან დეტალურად განიხილავს. დავით უსუფაშვილმა შესაბამის კომიტეტებს სთხოვა, რომ ამ საკითხის განხილვის დროს უზრუნველყონ საჯაროობაც, ინტერესთა ჯგუფების მონაწილეობაც. „რაც შეიძლება კარგად უნდა იყოს განმარტებული თუ რა ნოვაციები შემოდის, რა იქნება სიახლე და ვისთვის რა იცვლება და კარგად აუხსნან მოსახლეობას, თუ რატომ იღებს ქვეყანა ამ კანონპროექტს. უნდა ნათლად იყოს ახსნილი, რომ იმ ადამიანებს, ვინც აღნიშნული ტიპის ავტომანქანებს ფლობს, არანაირ პრობლემებს არ შეუქმნის“, - განაცხადა პარლამენტის თავმჯდომარემ. კანონპროექტში სხვა თემებიცაა, რომლებსაც დავით უსუფაშვილის თქმით, ასევე კარგი შესწავლა სჭირდება რომ პასუხგაუცემებლი კითხვები არ დარჩეს. ასეთ შემთხვევაში იგი დარწმუნებულია, რომ სწორედ ისეთ კანონპროექტს მიიღებენ, რომელიც ყველა მოქალაქისთვის ყოველმხრივ დასაბუთებული და გააზრებული იქნება.