"კოკაინის საქმეზე" ბრალდებულ ბოჭორიშვილს პოლიტიკურ პატიმრად არ მივიჩნევდით

"კოკაინის საქმეზე" ბრალდებულ ბოჭორიშვილს პოლიტიკურ პატიმრად არ მივიჩნევდით - ბერძენიშვილი

პოლიტიკა - 17:30, 14 Dec, 2015

2488

"რესპუბლიკური პარტია" "კოკაინის საქმეზე" ბრალდებულ ნუგზარ ბოჭორიშვილს პოლიტიკურ პატიმრად არ მიიჩნევდა " - ამის შესახებ "ნიუპოსტს" პარლამენტის ევროინტეგრაციის კომიტეტის თავმჯდომარემ, ლევან ბერძენიშვილმა განუცხადა.

როგორც ბერძენიშვილი აცხადებს, ბოჭორიშვილი "რესპუბლიკური პარტიის" წევრი ნამდვილად იყო, თუმცა ის პარტიის საქმიანობასთან დაკავშირებული არ ყოფილა.

"დავიწყოთ იქიდან, რომ როცა ბოჭორიშვილს აკავებდნენ ის უკვე აღარ იყო პარტიის წევრი. ვადასტურებთ, რომ ბოჭორიშვილი ადრე იყო ჩვენი პარტიის წევრი, თუმცა ბოჭორიშვილის დევნა, როგორც რესპუბლიკური პარტიის წევრის უბრალოდ არ მიმდინარეობდა, ის არ იყო გამორჩეული პარტიული მოღვაწე. მაგაზე მნიშვნელოვანი ხალხი გვყავდა და გვყავს პარტიაში. მისი დაკავების დროს, გვკითხეს, ხომ არ იყო ეს პოლიტიკური დევნა, მაგრამ მაშინაც ვთქვით, რომ საქმე არ გვქონდა დევნასთან"- აღნიშნა ბერძენიშვილმა.

რაც შეეხება ეკა ბესელიასა და მანანა კობახიძის პროკურატურაში დაკითხვის საკითხს, უმრავლესობის წევრი აცხადებს, რომ "მისი კოლეგები უდანაშაულობის პრეზუმფციით სარგებლობენ, სანამ გამოძიება საპირისპიროს არ დაამტკიცებს".

ცნობისთვის პარლამენტის ვიცე-სპიკერმა, მანანა კობახიძემ განაცხადა, რომ ნუგზარ ბოჭორიშვილი „რესპუბლიკური პარტიის“ წევრი იყო, როცა მის მიმართ დევნა მიმდინარეობდა.

„ეს ცნობა და დოკუმენტი არსებობდა, ეს ცნობა თავად „რესპუბლიკურმა პარტიამ“ გასცა და მას მოთხოვნა ჰქონდა, რომ მისი საქმე როგორც „რესპუბლიკური პარტიის“ წევრის ისე განხილულიყო“ - განაცხადა კობახიძემ.