ევროკომისარი იოჰანეს ჰანი მიიჩნევს, რომ საქართველოსთან სავიზო რეჟიმის ლიბერალიზაციასთან დაკავშირებით ევროკომისია დადებით დასკვნას გამოაქვეყნებს.

ამის შესახებ ჰანმა ჟურნალისტებთან საუბრისას განაცხადა.

"ხვალ გვექნება პოზიტიური ანგარიში და რეკომენდაცია საქართველოსა და უკრაინაზე. ასევე ველი, რომ იგივე სახის ანგარიში გვექნება კოსოვოზეც. ეს იქნება საბოლოო ანგარიში, რომელიც შეეხება საკითხს, თუ რა არის ჩვენი მიზანი. წევრ ქვეყნებს წარვუდგენთ მას რეკომენდაციებთან ერთად უვიზო მიმოსვლისთვის. ახლა წევრმა ქვეყნებმა უნდა იმსჯელონ. შეიძლება ამ პროცესს რამდენიმე თვე დასჭირდეს, მაგრამ დარწმუნებული ვარ, რომ ჩვენ სწორი გზით მივდივართ," - აღნიშნა ევროკომისარმა იოჰანეს ჰანმა.

საქართველოს მიერ ,,სავიზო რეჟიმის ლიბერალიზაციის სამოქმედო გეგმის“ შესრულების შესახებ საბოლოო ანგარიში ხვალ 15 დეკემბერს გამოქვეყნდება. ევროკომისიის ანგარიში გახდება წინაპირობა ევროკავშირის წევრი სახელმწიფოებისთვის, დათანხმდნენ ვიზალიბერალიზაციის რეჟიმის შემოღებას საქართველოსა და უკრაინის მოქალაქეებისთვის.