"ერთიანი ნაციონალური მოძრაობის" დეპუტატის ზურაბ მელიქიშვილის თქმით, ბოლო წლების განმავლობაში საქართველოს ეკონომიკა მნიშვნელოვნად გაღარიბდა, ამის დაფარვას კი საქართველოს ხელისუფლება გაუფასურებული ლარის პარამეტრებით ცდილობს:

"საქართველოს ეკონომიკა, ბოლო წლების განმავლობაში, გაღარიბდა, რის დაფარვასაც გაუფასურებული ლარის პარამეტრებით ცდილობს საქართველოს მთავრობა და მათ შორის ფინანსთა მინისტრი ნოდარ ხადური. თუმცა, ყველას შეუძლია რეალური სურათი საქტატის ოფიციალურ ინფორმაციაში იხილოს, სადაც საქართველოს ეკონომიკა გამოსახულია დოლარში და იმ რეალურ გაღარიბებას ასახავს, რასაც თითოეული მოქალაქე გრძნობს. აღნიშნული სტატისტიკის შესაბამისად თვალნათლად ჩანს, რომ 2015 წლის პირველ 2 კვარტალში, გასული წლის პირველ 2 კვარტალთან შედარებით, საქართველოს ეკონომიკა 940 მილიონი დოლარით შემცირდა. რომ შევადაროთ მთლიანი შიდა პროდუქტის მიხედვით ერთ სულ მოსახლეზე ნომინალში, დოლარში შემოსავალი, მხოლოდ 8 დოლარით გაიზარდა 2015 წლის მე-2 კვარტალში. თუმცა, აქვე აღსანიშნავია, რომ ეს დაანგარიშებულია 3 მილიონ 700 ათას მოსახლეზე, ხოლო 2014 წლის მაჩვენებელი ძველი აღრიცხვით არსებულ რაოდენობაზე. აქაც მხოლოდ 8 დოლარზეა საუბარი. გვეუბნებიან, რომ დოლარში მთლიანი შიდა პროდუქტი არ ანგარიშდება, თუმცა ესაა ის ინფორმაცია, რომელსაც საერთაშორისო ორგანიზაციები იყენებენ, ისევე როგორც ინვესტორები. "- განაცხადა ზურაბ მელიქიშვილმა.