"დააკვირდით , ვინ ახმაურდა ელისაშვილის განცხადებების შემდეგ?- ნაციონალები და კილაძე!"- ბესელია

პოლიტიკა - 11:58, 14 Dec, 2015

5747

ალეკო ელისაშვილის მიერ გაჟღერებულ ბრალდებებს , იმასთან დაკავშირებით, რომ ზოგიერთი პოლიტიკოსი შეწყალების კომისიაზე ზეწოლას ახდენდა, რათა კონკრეტული პატიმრის შეწყალებაზე დადებითი რეკომენდაცია გაცემულიყო, პარლამენტის ადამიანის უფლებათა დაცვის კომიტეტის თავმჯდომარე ეკა ბესელია გამოეხმაურა. ბესელიას თქმით, პატიმართა შეწყალების თაობაზე აგორებული სკანდალი პოლიტიკური კამპანიაა და ის ამ ყველაფერს წინასაარჩევნო პერიოდის დადგომას უკავშირებს.

„თუ მართლა ჰქონდა ადგილი კორუფციულ დანაშაულს , რაზეც ბატონი ელისაშვილი ლაპარაკობს, მაშინ ყველა დამნაშავე კანონის ძალით უნდა დაისაჯოს, მაგრამ თუ ასეთი დანაშაული არ დადასტურდება , კანონის მთელი სიმკაცრით უნდა დაისაჯოს თავად ბატონი ელისაშვილი! საინტერესოა , რატომ აუბა მხარი ბატონ ელისაშვილს „სკანდალურმა“ ელისო კილაძემ? რა კავშირია მათ შორის? ამ პროცესში კილაძის გამოჩენამ ბევრი რამ ცხადი გახადა, რადგან ყველამ იცის , ეს ქალი რას წარმოადგენს და თავისი ცრუ განცხადებებით , გამოგონილი ფაქტების ტირაჟირებით ვის ინტერესებს ემსახურება! დააკვირდით , ვინ ახმაურდა ელისაშვილის განცხადებების შემდეგ?- ნაციონალები და კილაძე!

კონკრეტულ საქმეებთან დაკავშირებით ბატონ ელისაშვილს არასოდეს შევხვედრივარ! საერთოდ , იმ პერიოდში, როცა ბატონი ელისაშვილი შეწყალების კომისიის თავმჯდომარე იყო მასთან არანაირი შეხება არ მქონია!“- აცხადებს ეკა ბესელია „ასავალ-დასავალთან“ ინტერვიუში.