ინფრასტრუქტურის მინისტრი ნოდარ ჯავახიშვილი ალეკო ელისაშვილის ბოლოდროინდელ განცხადებებს აფასებს და ვარაუდობს, რომ საკრებულოს დეპუტატს რეკომენდაცია ზეწოლაში ერევა.

მინისტრის თქმით, მასაც ჰქონია შემთხვევები როდესაც მის უწყებაში ნიჭიერ კადრებს მისივე კოლეგები სთავაზობდნენ, თუმცა როგორც ჯავახიშვილი ამბობს, ეს მისთვის სასიამოვნოცაა.

„აბსოლუტურად არ მგონია, რომ ელისაშვილს ტყუილის თქმა დასჭირდა, მაგრამ ვინ როგორ აფასებს ამას. ეს არის ზეწოლა, თუ ეს არის რეკომენდაცია? არის შემთხვევა, როცა მე თვითონაც მქონია, მაგალითად მინისტრის პოსტზე ყოფნისას, საკმაოდ მაღალი თანამდებობის პირი და კოლეგა ან სხვა ადამიანი მთავაზობს რომელიღაც ნიჭიერ ახალგაზრდას. ახლა მე შეიძლება ეს ჩავთვალო ზეწოლად, მაგრამ მე ამას ვღებულობ დიდი მადლობით, რომ ისიც ფიქრობს ჩემზე, რომ სამინისტროს კადრები სჭირდება“, - აცხადებს ნოდარ ჯავახიშვილი.