ემუქრება თუ არა ალეკო ელისაშვილის ციხე - "თუ გავლენიანები არიან საქმეს შეუბრუნებენ"

პოლიტიკა - 13:55, 11 Dec, 2015

4938

ადვოკატი გელა ნიკოლაიშვილი შეწყალების კომისიის ყოფილი თავმჯდომარის ალეკო ელისაშვილის მიერ გავრცელებულ სკანდალურ ინფორმაციას ეხმაურება. ნიკოლაიშვილის თქმით, იმის დამტკიცება, რომ პოლიტიკოსები პატიმრების შეწყალების სანაცვლოდ შეწყალების კომისიის წევრებზე ზეწოლას ახორციელებდნენ და სასურველი შედეგის მისაღებად ქრთამს სთავაზობდნენ, ძნელი იქნება. ამასთანავე ნიკოლაიშვილი არ გამორიცხავს იმ ფაქტსაც, რომ თუ ის პირები ვინც ელისაშვილმა პროკურატურაში დაასახელა, გავლენიანები არიან, საქმე ისე შემოაბრუნონ, რომ ცრუ დასმენის გამო ალეკო ელისაშვილის გარკვეული პასუხისმგებლობა მოითხოვონ.

„მე ვფიქრობ, იმდენად რთულია ამ ყველაფრის დამტკიცება, რომ თუ კონკრეტული მოწმე არ გამოვიდა და არ თქვა, - კი, მე ავიღე ფული ან მე მივეცი ფული... ჩემი გამოცდილებიდან ვიცი, რომ ასეთი საქმეების გახსნა ძალიან რთული, ან თითქმის შეუძლებელია, არავინ არ გამოვა და არ იტყვის- კი ბატონო, დავაშავე, ან დაშავებას ვაპირებდი და მაპატიეთო. აქედან გამომდინარე, მე ვერ ვხედავ პერსპექტივას, რომ ამ საქმიდან რამე გამოვიდეს და ვინმეს პასუხისმგებლობის საკითხი დადგეს.

თუ ის პიროვნება (ან პიროვნებები), რომელიც ელისაშვილმა პროკურატურაში დაასახელა, გავლენიანები არიან და ვერდამტკიცების შემთხვევაში, ცრუ დასმენებისთვის შეუბრუნებენ საქმეს, სავსებით შესაძლებელია, რომ ცრუ დასმენის გამო ალეკოს გარკვეული პასუხისმგებლობა მოსთხოვონ. ცრუ დასმენა კი 3 წლამდე ციხეს ითვალისწინებს, მაგრამ იმედია, აქამდე საქმე არ მივა.“- აცხადებს გელა ნიკოლაიშვილი.