საქართველოს პრეზიდენტმა და პირველმა ლედიმ მედია კონკურსის მონაწილეებს უმასპინძლეს

პოლიტიკა - 09:55, 10 Dec, 2015

968

საქართველოს პრეზიდენტმა და პირველმა ლედიმ „კულტურული მრავალფეროვნებისათვის აღმოსავლეთ ევროპაში“ მედიის საერთაშორისო კონკურსის ნომინანტებსა და ორგანიზატორებს უმასპინძლეს.

კონკურსი “ადამის“ სახელწოდებით საქართველოში წელს პირველად იმართება. გიორგი მარგველაშვილმა სტუმრებს სიტყვით მიმართა და კულტურული მრავალფეროვნების მნიშვნელობაზე გაამახვილა ყურადღება:

„ჩვენთვის დიდი პატივია, რომ მედია დაჯილდოება „კულტურული მრავალფეროვნებისათვის აღმოსავლეთ ევროპაში“ საქართველოში იმართება. საქართველო ისტორიულად გამოირჩევა მრავალფეროვნებით და შემდგარია როგორც ქვეყანა სწორედ ამ მრავალფეროვნების ხარჯზე. ჩვენი სამიათასწლოვანი ისტორიის განმავლობაში, ოქროს ხანა საქართველოს სახელმწიფოებრიობისა, სწორედ ამ მრავალფეროვნების აღიარებას, განმტკიცებასა და განვითარებას უკავშირდება. როდესაც ჩვენ ვფიქრობთ იმ წარმატებებზე, რომლებისთვისაც მიგვიღწევია, როგორც ერს და სახელმწიფოს, ჩვენ ამაყად ვაღიარებთ სწორედ მრავალფეროვნების შედეგად შემდგარ კულტურას. თუმცა, არასდროს არ შეიძლება იყო თვითკმაყოფილი შენი წინაპრების მიღწევებით, თუ არ შეგიძლია ამ მიღწევების დღევანდელ დღეს გაცოცხლება და ამ ღირებულებების დაცვა. დღევანდელ რეალობაში იმ წარმატების გაცოცხლება, რომელსაც შენი წინაპრები ახერხებდნენ და რაც არის შენი იდენტობა და შენი კულტურა. ამიტომ მინდა მადლობა ვუთხრა ყველა მონაწილეს ამ ძალიან მნიშვნელოვანი პროცესის, რომელიც თანამედროვეობაში მედიის მეშვეობით სწორედ ამ მრავალმხრივ ჩართულობას ემსახურება. მინდა მადლობა გითხრათ და მინდა გისურვოთ წარმატება“,- აღნიშნა საქართველოს პრეზიდენტმა.

ღონისძიებაზე პროგრამის დირექტორმა შტეფან ტოლცმა პროექტის მონაწილეებს დიპლომები გადასცა. საღამოზე ასევე, წარმოდგენილი იყო საქართველოს პრეზიდენტის ფონდის მიერ დაფინანსებული პროექტის, პანკისის ფოტოსკოლის მოსწავლეების, კულტურული მრავალფეროვნების თემაზე შექმნილი ნამუშევრები. „კულტურული მრავალფეროვნებისათვის აღმოსავლეთ ევროპაში“ მედიის საერთაშორისო კონკურსის გალა კონცერტი, რომელიც პრეზიდენტის პატრონაჟით ტარდება დღეს გაიმართება, სადაც კონკურსში გამარჯვებულებს გამოავლენენ.