"ნატო-ს ექნება შემდეგი გაჩერება - ეს საქართველოა"

"ნატო-ს ექნება შემდეგი გაჩერება - ეს საქართველოა" - ხიდაშელი

პოლიტიკა - 19:47, 09 Dec, 2015

1331

საქართველოს თავდაცვის მინისტრი დარწმუნებულია, რომ "ნატო-ს ექნება შემდეგი გაჩერება და ეს გაჩერება საქართველოა."
თინათინ ხიდაშელმა ვაშინგტონში, სტრატეგიული და საერთაშორისო კვლევების ცენტრში სიტყვით გამოსვლისას ასევე განაცხადა, რომ ნატო-ს საგარეო საქმეთა მინისტერიალი საქართველოსთან მიმართებაში ერთმნიშვნელოვნად პოზიტიური იყო.
"მინისტერიალში მონაწილე საგარეო საქმეთა მინისტრებმა განაცხადეს, რომ შემდეგი ქვეყანა, რომელსაც ნატო-ში მიიწვევენ, საქართველო იქნება. MAP-ის არმიღება კი დაბრკოლებას არ წარმოადგენს, რადგან თუ იქნება პოლიტიკური გადაწყვეტილება, ნატო მე-10 მუხლის მიხედვით იმოქმედებს. მაგალითად, თუ ხვალ შვედეთი გადაწყვეტს გახდეს ნატო-ს წევრი, მას MAP-ს კი არ შესთავაზებენ, არამედ, პირდაპირ მიანიჭებენ წევრობას", - განაცხადა თინათინ ხიდაშელმა.

მისი თქმით, საქართველომ ნატო-ში ინტეგრაციის გზაზე აღებული ვალდებულები წარმატებით შესრულა.
"ჩვენ გვჭირდება გადაწყვეტილებები," - აღნიშნა მან.

ხიდასელმა ნატო-ს საგარეო საქმეთა მინისტერიალის კომუნიკეს ტექსტში ასახული დადებითი შტრიხების შესახებაც გაამახვილა ყურადღება.
"დოკუმენტში ორჯერ ნათლად არის ხაზგასმული, რომ საქართველოს ალიანსში გაწევრიანებისთვის ყველა საჭირო ინსტრუმენტი აქვს. ასევე პირველად გვითხრეს, რომ ჩვენ გაწევრიანებისთვის მომზადების პერიოდს გავდივართ. ვხედავთ წევრი ქვეყნების სურვილს და მონდომებას დადგნენ ჩვენ გვერდით და ითანამშრომლონ უკეთესი უსაფრთხოებისთვის, შეკავების პოლიტიკისთვის და შეიქმნას ყველა პირობა, რადგან როდესაც საქართველოს სასარგებლოდ პოლიტიკურ გადაწყვეტილებას მიიღებენ, ეს პროცესი იყოს მარტივი" - განაცხადა თინათინ ხიდაშელმა.