გია მაისაშვილი სიმსივნისგან სრულად განიკურნა

სოც.მედია - 15:51, 09 Dec, 2015

6197

9 თვის წინ, პოლიტიკოსსა და ეკონომისტ, გია მაისაშვილს სტამბოლის ერთ-ერთ კლინიკაში უმძიმესი ოპერაცია ჩაუტარდა. მას ტვინის სიმსივნის დიაგნოზი ჰქონდა დასმული. მიუხედავად უმძიმესი დიაგნოზისა, მან მაინც არ დაყარა ფარ-ხმალი და სიტუაციას არ შეეგუა. ოპერაციის შემდეგ, თავად წერდა ფეისბუკის საკუთარ გვერდზე, რომ - „ადგილი სადაც 3,5 სანტიმეტრიანი სიმსივნე იყო მოთავსებული ყველაზე მოსახერხებელ ადგილზე იყო ქირურგებისთვის სამუშაოდ და წარმატებული ოპერაციის შემდეგ იქნა სრულად მოკვეთილი. წინ დიდი ბრძოლაა, ამ ბრძოლაში დათმობას მე არ ვაპირებ, ამდენი მოყვარული ადამიანის დატოვებას, ისევ სიმსივნემ უნდა დათმოს დასათმობი“. გავიდა დრო და ასეც მოხდა, სიმსივნემ დათმო დასათმობი. რამდენიმე საათის წინ მან კვლავ სოციალური ქსელის საშუალებით ამცნო ყველა მის გულშემატკივარს სასიხარულო ამბავი.

„დიდი სიხარულითა და მადლიერებით ვატყობინებ მათ ვინც ამდენი თვეების მანძილზე იზიარებდა ჩემს ბრძოლას და ჩვენთვის ლოცულობდა, დღეს საღამოს გეგმიურმა ტომოგრაფიამ დაგვიდასტურა რომ ტვინი აბსოლუტურად სუფთაა, სიმსივნე დამარცხებულია. დაე, დარჩეს სამარადისოდ დათრგუნულ დასამარებული. ჯანმრთელი სხეული იმარჯვებს, სიცოცხლეს გაუმარჯოს! გადარჩენას! ოღონდ აზრიანს, რაღაცისთვის და ვიღაცისთვის და არა მხოლოდ გადარჩენას არსებობისთვის“- წერს გია მაისაშვილი ფეისბუკის გვერდზე.