საქართველოს პარლამენტი ვიზა ლიბერალიზაციასთან დაკავშირებით რეზოლუციას მიიღებს

პოლიტიკა - 10:20, 09 Dec, 2015

1485

ვიზა ლიბერალიზაციასთან დაკავშირებით თავისუფალი დემოკრატების მიერ შემუშავებულ რეზოლუციის ტექსტს, პარლამენტში დღევანდელ სესიაზე უყრიან კენჭს.

დოკუმენტში, რომელსაც საპარლამენტო უმრავლესობა და უმცირესობა უჭერს მხარს, საქართველოს საკანონმდებლო ორგანო მოუწოდებს ევროპარლამენტს, ევროკავშირის საბჭოსა და ევროპულ საბჭოს 15 დეკემბრამდე, საქართველოსთან მიმართებით ვიზა ლიბერალიზაციის თემაზე საერთო პოზიცია გამოხატონ.

დოკუმენტს დადებითად აფასებს საპარლამენტო უმრავლესობის ერთ-ერთი ლიდერი გია ვოლსკი. მისი თქმით დოკუმენტი სრულფასოვანია და მას უმრავლესობის მხარდაჭერა ექნება.

„მნიშვნელოვანი საკითხია ერთობლივი რეზოლუციის მიღება ვიზალიბერალიზაციასთან დაკავშირებით, რომლის ინიციატორიც არის „თავსუფალი დემოკრატები“. მგონია, რომ დოკუმენტი სრულფასოვანია და მას მხარი უნდა დავუჭიროთ“, - განაცხადა გია ვოლსკიმ.

რეზოლუციას მხარს უჭერს „ერთიანი ნაციონალური მოძრაობაც“. გოკა გაბაშვილის თქმით ვიზების ლიბერალიზაცია პოზიციის და ოპოზიციის კონსენუსის საკითხია:

„ვიზების ლიბერალიზაცია არის საერთო კონსენსუსის საკითხი, იმიტომ, რომ ყველას გვესმის საუბარია არა მხოლოდ ევროპასთან უვიზო მიმოსვლაში, რომელიც არ შეძლება საღად მოაზროვნე ადამიანს არ მსოწონდეს, არამედ ეს არის ევროინტეგრაციის გზაზე კიდევ ერთი ნაბიჯი და ევროპასთან კიდევ უფრო დაახლოება. ამიტომ ამის მხარდსაჭერა საერთო, საყოველთაოა“- განაცხადა გოკა გაბაშვილმა.

რეზოლუციის ინიციატორი პარტიის წარმომადგენლის ალექსი პეტრიაშვილის თქმით, საქართველოს პოლიტიკური ძალები საერთო მიზნის მისაღწევად, რასაც ევროპული ოჯახი ჰქვია, უნდა გაერთიანდნენ და ყველაფერი უნდა გააკეთონ უვიზო მიმოსვლის მისაღებად:

„ვიმედოვნებთ, პოლიტიკურ ძალებს ეყოფათ გამჭრიახობა, რომ მიიღონ ეს ინიციატივა და შეთავაზება. ყველა პოლიტიკური ძალა უნდა გაერთიანდეს, რომ ჩვენმა ქვეყანამ უვიზო მიმოსვლა მიიღოს. ყველას უნდა ვაჩვენოთ, რომ ჩვენ ვართ ევროპული ოჯახი“, - განაცხადა ალექსი პეტრიაშვილმა.