დღეს ჟენევის მოლაპარაკებების 34-ე რაუნდი გაიმართება. შეხვედრაზე საუბარი შეეხება რუსეთსა და აფხაზეთის დე-ფაქტო ხელისუფლებას შორის რამდენიმე დღის წინ გაფორმებულ ე.წ. დოკუმენტს. ასევე ქართული მხარე საოკუპაციო ხაზის მიმდებარე სოფლებიდან ადგილობრივების გატაცების ფაქტს დააყენებს. შერიგებისა და სამოქალაქო თანასწორობის საკითხებში სახელმწიფო მინისტრის მოადგილის ქეთევან ციხელაშვილის თქმით, მოლაპარაკებების დროს საუბარი შეეხება ბოლო პერიოდში რეგიონში შექმნილ ვითარებასაც.

"ე.წ. შეთანხმებები, რომლებიც გაფორმდა დე ფაქტო სოხუმთან სამხედრო თვალსაზრისით, იძლევა იმის საფუძველს, რომ გაჩნდეს ბევრი კითხვა, თუ რას ემსახურება ეს ყველაფერი. ცხადია, ამ კონტექსტში განსაკუთრებით აქტიურდება საერთაშორისო უსაფრთხოების მექანიზმების საჭიროება. რაც შეეხება ჰუმანიტარულ სამუშაო ჯგუფს, ამ შემთხვევაში, ცხადია, მთავარი საკითხი არის დევნილების თემა", - განაცხადა ციხელაშვილმა.