უმრავლესობის დეპუტატი ზვიად ძიძიგური არ იზიარებს ოპონენტების მოსაზრებას, რომ მაჟორიტარული საარჩევნო სისტემა არასამართლიანია.

დეპუტატის თქმით, სიმართლეს არ შეესაბამება არც ის ფაქტი, რომ მაჟორიტარული არჩევნები საერთაშორისო ორგანიზაციების მიერ უარყოფილია.

„არც ერთ საერთაშორისო ორგანიზაციას არ გაუკეთებია მსგავსი დასკვნა. გაეროს წევრ 70 ქვეყანაში არის სუფთა მაჟორიტარული არჩევნები, 68 ქვეყანაში არის პროპორციული არჩევნები და 44 ქვეყანაში - მაჟორიტარულ-პროპორციული არჩევნები. ის რომ გაეროს ქვეყნებს, სადაც მაჟორიტარული სისტემაა, უთხრა, რომ ეს არის უსამართლო, არ მგონია ასეთი ტიპის შეხედულება და დამოუკიდებულება მთლად კვალიფიციური იყოს. ზოგადად, იმის თქმა, რომ მაჟორიტარული საარჩევნო სისტემა არასამართლიანია და უნდა გავაუქმოთ, არასწორია", - განაცხადა ძიძიგურმა.

პარლამენტში საარჩევნო კოდექსში შესატანი ცვლილებების პროექტის განხილვა დღეს დაიწყო. პროექტის მიხედვით, თბილისში 10 მაჟორიტარული ოლქის ნაცვლად, 18 მაჟორიტარული ოლქი იქნება.

საქართველოს დანარჩენ რაიონებში მუნიციპალიტეტების გაერთიანების ან გაყოფის გზით 42 მაჟორიტარული საარჩევნო ოლქი შეიქმნება.