ნარმანიას ანგარიში - "თავის მოწონება უკმაყოფილო ქართული ოცნებისთვის"- აბესაძე

პოლიტიკა - 13:38, 08 Dec, 2015

1692

საკრებულოს ფრაქცია „ნაციონალური მოძრაობის“ თავმჯდომარე ირაკლი აბესაძე თბილისის მერის დავით ნარმანიას ერთი წლის საქმიანობის ანგარიშს გამოეხმაურა.
როგორც მან "ნიუპოსტთან" დედაქალაქის მერის მიერ სასტუმრო "რედისონში” გამართული პრეზენტაციის კომენტირებისას აღნიშნა, დავით ნარმანიას დედაქალაქში არსებულ მწვავე პრობლემებზე არ უსაუბრია.
ენმ-ს წევრი ამბობს, რომ გასაკეთებელი ბევრად მეტია.
"ნარმანიამ დღეს სიამაყით თქვა, რომ ერთწლიანი მუშაობის შედეგად 480 000 ხე დარგო, თუმცა არაფერი უთქვამს იმ ჯანსაღ ხეებზე, რომელიც შიდა გზების გაყვანილობის გამო მოიჭრა, ბოლო შემთხვევას შეგახსენებთ, რომცა 600 ხე მოიჭრა, მაშინ როცა ამას პროექტი საერთოდ არ ითვალისწინებდა. თბილისის მერი არაფერს ამბობს, დაუგებელ გზებზე, მას არ უსაუბრია შეუსრულებელ ინფრასტრუქტურულ პროექტებზე, რომლის ერთ-ერთი მიზანი დედაქალაქში არსებული საცობების მოგვარება უნდა იყოს. ნარმანიამ თავი აარიდა და საერთოდ არაფერი თქვა იმ კორუფციულ საქმეებზე, რომლებიც მის სამსახურში ხდება. მას არ უსაუბრია იმ ნეპოტიზმზე და არაკვალიფიციურ თანამშრომლებზე რომელიც საზოგადოების მხრიდან მთელი წლის განმავლობაში პროტესტდებოდა"- განაცხადა ირაკლი აბასაძენ "ნიუპოსტთან" საუბრისას.
საკრებულოს წევრი თბილისის მერის მიერ დღეს გამართულ პრეზენტაციას "მინისტრებთან თავის მართლებას" უწოდებს და ამბობს, რომ ნარმანიას მუშაობა მთავრობაშიც არ მოსწონთ.
"ნარმანიას მუშაობით ქართული ოცნებაც კი არ არის კმაყოფილი, ამ პრეზენტაციით კი ის შეეცადა თავი მოეწონებინა მინისტრების წინაშე. ამას მოწმობს ის ფაქტიც, რომ მერმა საკრებულოს ოპოზიციური წევრები ამ შეხვედრაზე არ მიიპატიჟა, მან ვერც ის გაბედა, შეხვედრაზე მიეწვია ის არასამთავრობო ორგანიზაციები, რომლებიც მერიის პრობლემატიკაზე მუშაობენ. ვერ გაბედა იმიტომ რომ თბილისის მერს საზოგადოებისთვის დედაქალაქში არსებულ პრობლემებზე სათქმელი არაფერი აქვს. იმას ნამდვილად ვერ იტყოდა საჯაროდ რომ მისი ჩინოვნიკები სამწუხაროდ კორუფციაში არიან ჩართულნი და ოცნებები მხოლოდ ნარმანიას და მაღალჩინოსნებს აუსრულდათ"- განმარტა აბესაძემ.
თბილისის მერის ერთი წლის შემაჯამებელი ანგარიში ხმაურის ფონზე მიმდინარეობდა. რედისონთან ორგანიზებული აქციის მონაწილეები დედაქალაქის მერის საქმიანობას სრულიად უარყოფითად აფასებენ. მათი თქმით, - - "ნარმანიას მერია კორუფციით, ნეპოტიზმით და უუნარობით არის გამორჩეული" .