"საქართველო არ უნდა იყოს ენერგოდამოკიდებული ქვეყანაზე, რომელსაც ოკუპირებული აქვს ჩვენი ტერიტორიები"

პოლიტიკა - 12:50, 08 Dec, 2015

1090

პარლამენტის თავმჯდომარე დავით უსუფაშვილი „გაზპრომთან“ მოლაპარაკებების საკითხს კიდევ ერთხელ ეხმაურება და ამბობს, რომ საქართველო რუსეთზე ენერგოდამოკიდებული არ უნდა იყოს.

თუმცა როგორც უსუფაშვილი განმარტავს, ეს არ ნიშნავს „გაზპრომთან“ ურთიერთობის გაწყვეტას.

„გაზპრომი“ ენერგეტიკის მინისტრს არ შემოუყვანია საქართველოში. „ქართულ ოცნებას“ დაგხვდა საქარველოში „გაზპრომი“, რომელიც ცნობილი გაზსადენის მეშვეობით გაზს აწვდის ჩვენს მეზობელ სომხეთს, რომელიც მნიშვნელოვნად არის დამოკიდებული რუსეთიდან მიღებულ ენერგომატარებელზე. ჩვენ ენერგეტიკის სფეროში გვაქვს პრინციპული პოზიცია. პირველი, საქართველო არ უნდა იყოს ენერგოდამოკიდებული ქვეყანაზე, რომელსაც ოკუპირებული აქვს ჩვენი ტერიტორიები და ცნობილია იმით, რომ ენერგოსაკითხებს პოლიტიკური მიზნებისთვის იყენებს ხოლმე. ამ საკითხში საქართველოს ხელისუფლება ამ პრინციპის და ამ ხაზის გამგრძელებელი ვართ და არ ვაპირებთ გავზარდოთ ენერგოდამოკიდებულება რუსეთზე, მაშინ როდესაც არსებობს ენერგომოწოდების ალტერნატიული ვერსია. ეს არ ნიშნავს, რომ გავწყვიტოთ ურთიერთობა „გაზპრომთან“, რომელიც კიდევ ერთხელ ვიმეორებ დაგვხვდა ქვეყანაში. ამაზე მიგანიშნებთ პირდაპირ, ახლა რომ იდგეს საკითხი გავაკეთოთ თუ არა ეს, შეიძლება ყოფილიყო ერთი პოზიცია, მაგრამ როდესაც ფუნქციონირებადი გაზსადენია, ეს სხვა საკითხია. ამ გაზსადენში ერთი ქვეყნიდან მოედინება გაზი და მეორე ქვეყანაში შედის. ერთ ქვეყანასთან თუ პრობლემა გავქვს, ამის გამო მეორე ქვეყანასთან არ უნდა გავიჩინოთ პრობლემა“, - განაცხადა უსუფაშილმა.

პარლამენტის თავმჯდომარის თქმით, „გაზპრომთან“ ურთიერთობამ საფრთხე არ უნდა შეუქმნას საქართველოს ურთიერთობას აზერბაიჯანთან, თურქეთთან, აშშ-სთან და ასე შემდეგ.

„ამ საკითხზე ინტენსიური კონსულტაციები მიმდინარეობს ყველასთან, მათ შორის აზერბაიჯანთან. გვაქვს აზერბაიჯანი-საქართველო-თურქეთის ფორმატი. ეს ყველაფერი ფუნქციონირებს. ამიტომ რაიმე საფუძველს, რომ ვიყოთ დაძაბული, რათა ენერგეტიკის მინისტრმა არაფერი ქნას ისეთი, უსაფუძვლოა. ცოტა არ იყოს საკმარისზე მეტ დროს გვახარჯინებს „გაზპრომი“ თავის თავზე სასაუბროდ“, - განაცხადა უსუფაშვილი.