პარლამენტში საარჩევნო კოდექსში შესატანი ცვლილებების პროექტის განხილვა იწყება. მისი ინიცირება საკანონმდებლო ორგანოში გასულ კვირას მოხდა. ცვლილების მიხედვით საარჩევნო ოლქების საზღვრები იცვლება.

უკვე ცნობილია, რომ უმრავლესობის მიერ მომზადებულ პროექტს ოპოზიცია მხარს არ უჭერს. როგორც „ნაციონალურ მოძრაობაში“ განმარტავენ, ცვლილების ამ ვარიანტს საკონსტიტუციო სასამართლოს გადაწყვეტილებასთან კავშირი არ აქვს.

„არაფერი კავშირი შემოტანილ ვარიანტს არ აქვს საკონსტიტუციო სასამართლოს გადაწყვეტილებასთან. ერთადერთი მიზანი, რაც აქვს ამ შემოტანილ პროექტს და ოლქების სრულიად უაზრო დაჭრას და ახალ ფორმირებას არის ერთი, რომ როგორმე „ქართულმა ოცნებამ“ გაიადვილოს 2016 წლის საპარლამეტო არჩევნებზე მაჟორიტარული წესით საკუთარი წარმომადგენლების გაყვანა,“ - განაცხადა ხათუნა გოგორიშვილმა.

პროექტის მიხედვით, თბილისში 10 მაჟორიტარული ოლქის ნაცვლად, 18 მაჟორიტარული ოლქი იქნება.

საქართველოს დანარჩენ რაიონებში მუნიციპალიტეტების გაერთიანების ან გაყოფის გზით 42 მაჟორიტარული საარჩევნო ოლქი შეიქმნება.