საქართველოს კათოლიკოს პატრიარქისთვის მსჯავრდებულთა შეწყალების უფლების მინიჭების საკითხს რესპუბლიკური პარტიის ლიდერები უარყოფითად უყურებენ და აცხადებენ, რომ მათი აზრით, ეს საკონსტიტუციო ცვლილება პარლამენტში მიღებული არ იქნება.

პარლამენტის თავმჯდომარე დავით უსუფაშვილი აცხადებს, რომ შეწყალება არის სახელწმიფოს მეთაურის - პრეზიდენტის პრეროგატივა და იგი ელოდება მეტ ინფორმაციას პრემიერ-მინისტრ ირაკლი ღარიბაშვილისაგან, რომელმაც გუშინ ამ საკითხზე მსჯელობის დაწყებისკენ პარლამენტსა და პრეზიდენტს წერილობით მოუწოდა.

„მე მაინცდამაინც არ მახსენდება შემთხვევა სახელმწიფოს მეთაურის გარდა ვინმეს ჰქონდეს ეს ძალიან მძიმე ტვირთი. უფრო შესაძლებელია ჩართულობაზე იყოს საუბარი და არა რაიმე უფლების ვინმესთვის გადაცემაზე ან გაყოფაზე. მე არ მახსენდება ასეთი კონსტიტუციური მოდელი. მგონი მცირე გაუგებრობასთან გვაქვს საქმე იმიტომ, რომ მე არ ვიცი პრეცედენტი როდესაც რაიმე სხვაგვარად არის დარეგულირებული - შეწყალება როგორც სასჯელისგან გათავისუფლება. ეს არის სახელწმიფოს მეთაურის პრეროგატივა,“ - განაცხადა დავით უსუფაშვილმა.

ლევან ბერძენიშვილის განცხადებით, ეს შეიძლება ძალიან ჰუმანური და კეთილი სურვილი იყოს, რომელსაც ასრულება არ უწერია, ვინაიდან კონსტიტუციური თვალსაზრისით სახელწმიფო ამ უფლებას ვერავის გადასცემს. ეს არის პრეზიდენტის უფლება და მისი შეთავსება ვინმეს არ შეუძლია.

„საკონსტიტუციო ცვლილებებზე მსჯელობა იქნება, მაგრამ ეს ცვლილებები ჩემი აზრით, არ იქნება,“ - აცხადებს ლევან ბერძენიშვილი.