გაბაშვილი ფარულ ჩანაწერს გამოეხმაურა-"დაძაბულობა ივლისში გავიარეთ, მერე ერთმანეთს ხელი ჩამოვართვით"

სოც.მედია - 19:13, 05 Dec, 2015

3490

„ერთიანი ნაციონალური მოძრაობის“ ერთ-ერთი ლიდერი გიორგი გაბაშვილი რამდენიმე დღის წინ მისი და მისი ძმის დავით გაბაშვილის სატელეფონო საუბრის ფარული ჩანაწერის გავრცელებას გამოეხმაურა. გაბაშვილის თქმით ჩანაწერი კონტექსტიდან ამოგლეჯილი ნაწყვეტებისგან შედგება. როგორც გაბაშვილი ამბობს ენმ-ში, როგორც ყველა სხვა დიდ და ცოცხალ პარტიაში შიდა დაძაბულობები არსებობს, თუმცა ამჟამად ეს დაძაბუილობა განმუხტულია და პარტიაში ყველა კონცენტრირებულია მიზანზე, რომ ივანიშვილი და მისი რეჟიმი დაამარცხოს:

„მეგონა, საღ აზრზე მყოფი ადამიანებისთვის არ გახდებოდა საჭირო დამატებითი განმარტებები, რომ ორი უახლოესი ადამიანის პრივატული საუბრის ნაწყვეტების, კონტექსტიდან ამოგლეჯით, საჯარო სივრცეში გამოფენა იმდენად მდაბიო რამაა, რომ პოლიტიკური განხილვის თემა არ შეიძლება გახდეს. ყველა დიდ და ცოცხალ პარტიაშია შიდა დაძაბულობები შიდაპარტიული არჩევნების დროს. ნებისმიერი სახის პრაიმერი რეალური დაძაბულობაა ყველგან, ყველა ქვეყანაში.

ეს ივლისში გავიარეთ და მას მერე ყველამ ერთმანეთს ხელი ჩამოვართვით და დღეს ისევ ყველა ერთიანად ვართ კონცენტრირებული მთავარ მიზანზე - ერთად, ერთ გუნდად დავამარცხოთ მავნებელი ოლიგარქი ივანიშვილი და მისი სამარცხვინო ამალა. და ამ ბრძოლაში ყველა ერთად გავიმარჯვებთ! მიშას კი, რომელსაც საქართველოს მოქალაქეობა ჩამოართვეს, 22 წელია ვიცნობ და დამიჯერეთ - ეს აქტი ბიძინას მშვიდ ძილს, ყოველ საღამო ათ საათზე, ვერ უზრუნველყოფს“- წერს გოპრგი გაბაშვილი.

შეგახსენებთ, გოკა გაბაშვილის და მისი ძმის სატელეფონო საუბრის ფარული ჩანაწერი ორი დღის წინ გავრცელდა. გოკა გაბაშვილი დავით გაბაშვილს პარტიაში არსებულ დაძაბულობაზე ესაუბრებოდა.