,,თუ ოდესმე არჩევნებში რესპუბლიკური პარტია 40%-ს მიიღებს, ან რესპუბლიკელებთანაა საქმე ცუდად, ან ქვეყანაში“

,,თუ ოდესმე არჩევნებში რესპუბლიკური პარტია 40%-ს მიიღებს, ან რესპუბლიკელებთანაა საქმე ცუდად, ან ქვეყანაში“ - უსუფაშვილი

პოლიტიკა - 17:59, 05 Dec, 2015

1886

თუ გვინდა მრავალფეროვნება, არცერთი პარტია ე.წ. საკონტროლო პაკეტს 50+1 არ უნდა ფლობდეს - ამის შესახებ პარლამენტის თავმჯდომარემ დავით უსუფაშვილმა ,,რესპუბლიკური პარტიის“ კონფერენციაზე ჟურნალისტებთან განაცხადა. უსუფაშვილის თქმით, დემოკრატიის წინაპირობა სწორედ მრავალპარტიულობაა. ეს განცხადება უსუფაშვილმა მედიასთან ,,ექსპო ჯორჯიაში“ კონფერენციაზე გამოსვლის შემდეგ, მისი სიტყვების განმარტებისას გააკეთა. პარლამენტის თავმჯდომარე აცხადებდა, რომ ,,თუ ოდესმე არჩევნებში "რესპუბლიკური პარტია" 40%-ს მიიღებს, ან რესპუბლიკელებთანაა საქმე ცუდად, ან ქვეყანაში, ან ორივეში ერთად“. უსუფაშვილის თქმით, მხარდამჭერების გაზრდა არ ნიშნავს კომუნისტურ პარტიად გარდაქმნას, სადაც მხოლოდ ერთი პარტია ფლობს უმრავლესობას.

"რაც შეეხება ჩემს განცხადებას, მე ვგულისხმობ იმას, რომ ეს ფორმულა თანაბრად ეხება ყველა პარტიას. თუ გვინდა მრავალფეროვნება, უნდა შევეგუოთ იმას, რომ საზოგადოებაში არც ერთ პარტიას არ შეიძლება ჰქონდეს ე.წ. საკონტროლო პაკეტი 50 + 1. პარტიისთვის ეს არ უნდა იყოს აუცილებელი მოთხოვნილება. მაშინ ჩვენ ვამბობთ იმას, რომ საქართველოს ნახევარზე მეტი ჩვენნაირი უნდა იყოს. რატომ უნდა იყოს ჩვენნაირი, როდესაც ვიცი, რომ არ არის ჩემნაირი. ეს ეხება რესპუბლიკელებსაც და ყველა სხვა პარტიასაც. დღეს ჩვენ შიდა წრეში ვსაუბრობდით და ამიტომ რესპუბლიკელებთან ვიხმარე ეს გამოთქმა", - განაცხადა უსუფაშვილმა.