მსჯავრდებულების მონაწილეობით რუსთაველის თეატრში გამართულ სპექტაკლს უწყების ხელმძღვენელმა ემოციური ფაქტი უწოდა. კახა კახიშვილის თქმით სპექტაკლზე მსჯავრდებულების მაყურებლების რანგში დასწრება სწორედ პატრიარქის დამსახურება იყო.

„როდესაც პატრიარქს სპექტაკლზე დასწრება ვთხოვე, მითხრა რომ კარგი იქნებოდა თუ მაყურებლებს შორის მსაჯვრდებულები იქნებოდნენ. ჩვენ შევასრულეთ მისი უწმინდესობის თხოვნა და დღეს, სპექტაკლს 80 მსჯავრდებული ესწრებოდა. თითოეული ჩვენი თანამშრომლისთვის და თითოეული ჩვენი მსჯავრდებულისთვის ძალიან ემოციური დღე იყო. პირველად გამოვიყვანეთ პატიმრები თეატრში და რუსთაველის თეატრის სცენაზე შესანიშნავ სპექტაკლს ვუყურეთ, რომელშიც დევს ძალიან ბევრი რამ. ჩემთვის პირადად ძალიან ემოციური დღე იყო. ძალიან ემოციური იყო ბატონი პრემიერ-მინისტრის, მინისტრების მობრძანება. მინდა დიდი მადლობა გადავუხადო მსჯავრდებულ ქალბატონებს, რომლებმაც მონაწილეობა მიიღეს სპექტაკლში, ასევე, რეჟისორს და თითოეულ ჩემს თანამშრომელს. წარმოიდგინეთ, რამდენად დიდი შრომა იყო ჩადებული იმისთვის, რომ დღევანდელი დღე შემდგარიყო“, - განაცხადა კახა კახიშვილმა.

სპექტაკლის დასრულების შემდეგ პატრიარქმა სასჯელაღსრულებისა და პრობაციის მინისტრს მადლობა გადაუხადა და კახა კახიშვილს საჩუქრად ხატი გადასცა.
„საოცარი იყო, ხალხმა ცრემლები ვერ შეიკავა. ჩვენ დავინახეთ ტკივილი და მოქცევა ქართველი ადამიანისა. მე ვფიქრობ, ეს ჩვენი ახალი მინისტრის დამსახურებაა და მინდა მას გადავცე ხატი საჩუქრად“, - განაცხადა პატრიარქმა.

რუსთაველის თეატრში მსჯავრდებულების მონაწილეობით გამართულ სპექტაკლს სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე; პრემიერ-მინისტრი ირაკლი ღარიბაშვილი; მინისრტთა კაბინეტის წევრები; არასამთავრობო და საერთაშორისო ორგანიზაციების წარმომადგენლები; მოლდოვის რესპუბლიკის იუსტიციის სამინისტროს დელეგაცია; დიპლომატიური კორპუსის წარმომადგენლები; უფლებადამცველები; მსჯავრდებულები და მსჯავრდებულთა ოჯახის წევრები; სასჯელაღსრულებისა და პრობაციის სამინისტროს წარმომადგენლები და დეპუტატები დაესწრნენ.