დავით ნარმანია - ,,ვერეს ხეობაში სავაჭრო ცენტრები და საცხოვრებელი კორპუსები არ აშენდება“

პოლიტიკა - 13:21, 05 Dec, 2015

1215

საკმაოდ საინტერესო კონცეფცია უწოდა თბილისის მერმა ვერეს ხეობის განვითარების ახალ პროექტს. დავით ნარმანიას განმარტებით ტერიტორიაზე სავაჭრო ცენტრებისა და საცხოვრებელი კორპუსების აგება არ იგეგმება. მერის თქმით, ვერს ხეობაში სტიქიის დროს დაღუპულთა ხსოვნის პატივსაცემად, მემორიალი აშენდება.

„რაც ყველაზე მთავარია, ეს იქნება რეკრეაციული სივრცე. ასევე შემოთავაზებულია საგანმანათლებლო ცენტრისა და სპორტული კომპლექსის, საფეხმავლო და ველო ბილიკების გაკეთება. ამ ტერიტორიაზე მოეწყება 13 ივნისის სტიქიის დროს დაღუპულ ადამიანთა ხსოვნისადმი მიძღვნილი მემორიალი, რომ ეს ადამიანები არასოდეს დაგვავიწყდეს. განხილვის შემდეგ ვისაუბრებთ კონცეფციის დახვეწაზე, შემდეგ მომზადდება პროექტი. ამ პროექტის ერთ-ერთი მნიშვნელოვანი კომპონენტია უსაფრთხოება. სავაჭრო ცენტრები და საცხოვრბელი კორპუსები აქ არ აშენდება, ამასთან დაკავშირებით პოლიტიკური გადაწყვეტილება დიდი ხანია მიღებულია“,-განაცხადა დავით ნარმანიამ.

კონცეფციაში ვერეს ხეობაში 13 ივნისის მოვლენისადმი მიძღვნილი სიმბოლოს შესაძლო განთავსებისთვის ტერიტორიაც არის განსაზღვრული, რომელიც ხეობის თითქმის ყველა წერტილიდან იქნება აღქმადი.

„ჩარჩო გეგმის“ შესყიდვის ღირებულება 69 618,82 შეადგენს და გეგმის შემუშავების მიზანია ხელი შეუწყოს საპროექტო ტერიტორიის ოპტიმალურ ურბანულ დაგეგმარებას - მდგრადი განვითარების, თანაბარი შესაძლებლობების სივრცისა და კერძო და საჯარო ინტერესების შეჯერების პრინციპების გათვალისწინებით.