"სამართალდამცავთა დაცვის ლიგის" წევრი, პოლიციის ყოფილი მაღალჩინოსანი ზაზა ჭაია ე.წ. "კორტების სპეცოპერაციის" საქმეზე დაკავებული გიორგი ცააძის მხარდასაჭერ პოსტს აქვეყნებს.

"საქართველოს ავტოკრატიულ რეჟიმს, პოლიციის ოფიცერთა ბედი ეწირება. რეჟიმის დაკოჭლებული სასამართლო არად დაგიდევთ, არც სამართალს და არც სიმართლეს და ვიღაცის ნებიდან გამომდინარე, ციხეში ყრის პოლიციელებს. გიორგი ცააძის ღირსება, სიმამაცე და პროფესიონალიზმი, ყველა სახელმწიფო ფორმაციას ეჩხირებოდა თვალში, თუმცა მის თავს დატრიალებულმა უსამართლობამ, უკვე ყოველგვარ მოლოდინს გადააჭარბა. გიორგი რუსეთის ფედერაციაში ცხოვრობდა და როგორც კი შეიტყო, კორტების ღონისძიებაზე დაწყებული გამოძიება, თავის ნებით დაბრუნდა საქართველოში, რათა არავის ეფიქრა, რომ გაექცა გამოძიებას. როცა პოლიციელთა დაპატიმრებები დაიწყო, გიორგი, პრესისას და ტელევიზიის თვალწინ, თავის ფეხით გამოცხადდა გენერალურ პროკურატურაში , რათა არავის ეფიქრა, რომ ემალებოდა გამოძიებას. თავისი სიმართლის და სამართლიანი სასამართლოს უფლებით დაიმედებული, გიორგი თავის ფეხით წავიდა ციხეში, რათა საზოგადოებისთვის, რომლის ცნობადობაც მას არ აკლია, თავის სიმართლე სასამართლოში დაემტკიცებინა. თუმცა მოსამართლემ, რომელსაც პროცესები საკმაოდ ობიექტურად მიყავდა, რომელმაც ნახა, რომ ცააძის წინააღმდეგ მტკიცებულებები ხელოვნური იყო, რომელიც მშვენივრად მიხვდა, რომ ცააძეს იარაღი ნასროლიც კი არ ჰქონდა, მიიღო პოლიტიკური გადაწყვეტილება და ცააძეს განაჩენი განზრახ მკვლელობით გამოუტანა. მე დღეს ჩემი მეგობრის ბედს ვწუხვარ, რომელიც სახელმწიფომ უსამართლოდ გაწირა, თორემ სასამართლოს ამ გადაწყვეტილებასთან შედავებას არც ვიფიქრებდი.ვწუხვარ იმასაც, რომ ფეოდალური საქართველოს მდივანბეგთა სასამართლოს, გაცილებით მეტი ნდობა ჰქონდა, ვიდრე „დემოკრატიულ საქართველოს“, „დამოუკიდებელ სასამართლოს“. გიორგი ცააძის განაჩენით, სასამართლომ მოკლა სამართლიანობის განცდა და განაჩენი საკუთარ თავს გამოუტანა!"- წერს ზაზა ჭაია