”მნიშვნელოვანია ერთიან პოზიციაზე ვიყოთ, რაც ქვეყნის თავდაცვისუნარიანობას გააძლიერებს”- პრეზიდენტი

პოლიტიკა - 21:18, 04 Dec, 2015

1271

საქართველოს პრეზიდენტის განცხადებით, ქვეყნის უსაფრთხოებასთან დაკავშირებით კონკრეტული გეგმები შემუშავდა აღნიშნული განცხადება გიორგი მარგველაშვილმა უშიშროების საბჭოს სხდომის დასრულების შემდგომ გააკეთა .

”ჩვენ განვიხილეთ ქვეყნის თავდაცვის თვალსაზრისით უმნიშვნელოვანესი საკითხები, დამტკიცდა რამდენიმე გეგმა შევთანხმდით კორდინირებულ მუშაობაზე. ამასთან ერთად განსახილველი საკითხები ჩვენს ევროატლანტიკურ ინტეგრაციასთან დაკავშირებით და კიდევ რამდენიმე თავდაცვის გეგმასთან დაკავშირებით, გადატანილი იქნა შემდეგი სხდომისთვის. სხვა კონსტიტუციურ ფორმატს, სადაც ასეთი მაღალი გადაწყვეტილებები მიიღება ჩვენ არ ვიცნობთ, ამიტომ მნიშვნელოვანია ასეთ შეხვედრებზე ჩვენ ერთიან პოზიციაზე ვიყოთ და ეს პოზიცია აძლიერებდეს და ამტკიცებდეს ქვეყნის თავდაცვისუნარიანობას”- განაცხადა გიორგი მარგველაშვილმა.

დღევანდელ უშიშროების საბჭოს ფორმატში მთავრობის მიერ მიღებული საფრთხეების შეფასების დოკუმენტიც განიხილეს და ამ დოკუმენტიდან გამომდინარე სამხედრო გეგმებიც მოიწონეს. არსებულ დოკუმენტს ხელს პრეზიდენტი მოაწერს.

უშიშროების საბჭოს სხდომა პრეზიდენტის ადმინისტრაციაში 4 საათის განმავლობაში მიმდინარეობდა. შეხვედრას ესწრებოდნენ პარლამენტის თავმჯდომარე, თავდაცვის მინისტრი თინა ხიდაშელი, შინაგან საქმეთა მინისტრი გიორგი მღებრიშვილი, სუს-ის უფროსი ვახტანგ გომელაური, თავდაცვისა და უშიშროების კომიტეტის თავმჯდომარე ირაკლი სესიაშვილი, უშიშროების საბჭოს მდივანი ირინე იმერლიშვილი და შეიარაღებული ძალების გენერალური შტაბის უფროსი ვახტანგ კაპანაძე.

უშიშროების საბჭოს სხდომას მივლინებების გამო არ ესწრებოდნენ საგარეო საქმეთა მინისტრი გიორგი კვირიკაშვილი და პარლამენტის საგარეო ურთიერთობათა კომიტეტის თავმჯდომარე თედო ჯაფარიძე. სხდომას არ ესწრებოდა არც ქვეყნის პრემიერ-მინისტრი ირაკლი ღარიბაშვილი.