არასამთავრობო ორგანიზაციის წარმომადგენლები მარჯვენასაჭიან ავტომობილებთან და დაჯარიმების ახალ მეთოდებთან დაკავშირებით შსს-ს ინიციატივას აკრიტიკებენ.

მესამე სექტორის წევრებს დაგეგმილ სიახლესთან დაკავშირებით კითხვები აქვთ. როგორც ადამიანის უფლებების სწავლებისა და მონიტორინგის ცენტრის იურისტმა გურამ იმნაძემ განაცხადა, უფრო სიღრმისეული პრობლემები არსებობს, რომელსაც შსს ყურადღებას უნდა აქცევდეს.

„როდესაც შინაგან საქმეთა სამინისტროს რეფორმირებაზეა საუბარი, აქ უნდა იყოს საუბარი იმაზე, თუ რამდენად დგას სამინისტროში ყველაზე მწვავედ ეს პრობლემა. ჩვენ ვიცით, რომ სამინისტროში გაცილებით სიღრმისეული პრობლემებია, რომელიც გაცილებით მყისიერ რეაგირებას საჭიროებს“, - განაცხადა გურამ იმნაძემ.

არაადეკვატურს უწოდებს შსს-ს ახალ ინიციატივს „კონსტიტუციის 42-ე“ მუხლის წევრი არჩილ ჩოფიკაშვილიც.

„ჯარიმების და სანქციების გაზრდა ესეთი ტიპის დარღვევებზე არაადეკვატურია და შეუსაბამოა დღევანდელ სოციალურ ვითარებასთან“, - განაცხადა ჩოფიკაშვილმა.

საქართველოს შინაგან საქმეთა სამინისტროს მიერ საგზაო მოძრაობის უსაფრთხოების სფეროში სამთავრობო უწყებებთან ერთად შემუშავებული პროექტის მიხედვით 2016 წლის მარტიდან მარჯვენასაჭიანი ავტომობილების იმპორტი შეიზღუდება. რაც შეეხება სიახლეს მძღოლებისთვის - საგზაო მოძრაობას პოლიცია ამოსაცნობი ნიშნების გარეშეც გააკონტროლებს. სიახლე გულისხმობს, რომ პოლიციის მანქანები ამოსაცნობი ნიშნების გარეშე, მიკროავტობუსის ფორმის, წინასწარ განსაზღვრული მარშრუტით იმოძრავებენ. დარღვევები რეალურ დროში მოქალაქესთან კონტაქტის გარეშე დაფიქსირდება. ცვლილებები მართვის მოწმობებთან დაკავშირებითაც. შინაგან საქმეთა სამინსიტროს გადაწყვეტილებით, 2016 წლის პირველი იანვრიდან მართვის მოწმობის 100 ქულიანი სისტემა შემოდის. მძღოლები რამდენჯერაც დაარღვევენ საგზაო მოძრაობის წესებს ქულებიც შესაბამისად დააკლდებათ. როდესაც ქულა ნულზე ჩამოვა მათ მართვის მოწმობა გააუქმდებათ.