გადატვირთული ჯგუფები და პედაგოგების დაბალი ხელფასი- ოპოზიციის პრეტენზიები ბაღების მართვის სააგენტოსთან

პოლიტიკა - 13:36, 04 Dec, 2015

1201

საკრებულოში თბილისის საბავშვო ბაგა-ბაღების მართვის სააგენტოს ხელმძღვანელს თემურ თორდინავას უსმენენ. საკრებულოს დეპუტატები სკოლამდელი აღზრდის დაწესებულებებში შექმნილ ვითარებაზე და მომავალი წლის ბიუჯეტით გამოყოფილ დაფინანსებაზე მსჯელობენ.

საკრებულოს ოპოზიცია ბაღების ჯგუფებში ბავშვთა გადაჭარბებულ რაოდენობას აპროტესტებს. ენმ-ს განცხადებით, ზოგიერთ ჯგუფში 50-60 ბავშვიამ რაც ნორმალურ სააღმზრდელო პროცესის წარმართვას შეუძლებელს ხდის:

„საბავშვო ბაღის ჯგუფებში გადატვირთული რაოდენობა, 50-60 ბავშვია ერთ ჯგუფში, რაც ნორმალურ სააღმზრდელო პროცესის წარმართვას შეუძლებელს ხდის,“ - განცხადა თბილისის საკრებულოს ფრაქცია ნაციონალური მოძრაობა - თბილისის თავმჯდომარემ, ირაკლი აბესაძემ.

თორდინავას თქმით პედაგოგებისთვის ხელფასების ზრდისთვის 2016 წელს 3 მილიონ ლარზე მეტია გათვალისწინებული.

ბაგა-ბაღების სააგენტოს ხელმძღვანელი ჯგუფებში ბავშვების გადაჭარბებული რაოდენობის პრობლემას აღიარებს, პრობლემას გამომწევევ მიზეზად კი წლების განმავლობაში 50-მდე ბაღის გაუქმებას ასახელებს. თორდინავას განცხადებით, პრობლემის მოსაგვარებლად მუშაობა მიმდინარეობს და გამოსწორება ეტაპობრივად მოხდება.

"80-მდე ახალი ჯგუფი დაემატა მოქმედ საბავშვო ბაღებში. გარდა ამისა გარემონტდა რამდენიმე დახურული ბაღიც. მიმდინარეობს ახალი ბაღების მშენებლობაც. მომდევნმო წელს დაგეგმილია 10 საბავშვო ბაღის მშენებლობა "- განცხადა თორდინავამ.