საპარლამენტო უმრავლესობის წევრი ნუკრი ქანთარია არ იზიარებს მოსაზრებას, რომ საკანონმდებლო ორგანოში სპორტსმენები და ხელოვანები არ უნდა იყვნენ.

ამის შესახებ დეპუტატმა „იბერიის“ ეთერში რამდენიმე დღის წინ გასული ინფორმაციის საპასუხოდ განაცხადა, სადაც საუბარი იყო იმაზე, რომ 2016 წელს კოალიციის საარჩევნო სიაში სპორტსმენები და მსახიობები აღარ იქნებიან.

„რამდენჯერმე გამოითქვა პრეტენზია ხელოვანებზე, სპორტსმენებზე. გეთანხმებით, რომ უნდა იყოს პროპორციულად ყველაფერი. თუმცა ისიც გამორიცხულია, რომ პარლამენტი იურისტების კანტორა გახდეს და ისიც გამორიცხულია, რომ იქ მხოლოდ ხელოვანები იყვნენ. პარლამენტარი - ესეთი პროფესია არ არსებობს“, - განაცხადა ქანთარიამ.

კითხვაზე, ხომ არ გულისხმობს იურისტებში „რესპუბლიკური პარტიის“ წევრებს, ქანთარია ამბობს, რომ ეს ზოგადად თქვა.

„მათ აქვთ ყველა ატრიბუტი, რაც პარტიას უნდა ჰქონდეს არიან პროფესიონალები, მაგრამ მათ ვერ მოიპოვეს სახალხო დამოკიდებულება. ამის მიზეზი ალბათ არის ენა. ისინი განსხვავებული ენით საუბრობენ. ისინი ჩვენთან ერთად არიან კოალიციაში. მარადიული არაფერია, მაგრამ ჩვენ ერთიანად გავალთ მომავალ არჩევნებზე. რაც შეეხება საარჩევნო სიებს, სავარაუდოდ მარტში ან აპრილში გამოიკვეთება სილუეტები. ახალი სახეები სჭირდება ყველაფერს, თუმცა ამ ეტაპზე არაფერი არ ვიცი“, - აღნიშნა დეპუტატმა.