რუსული წნეხი ოკუპირებულ ტერიტორიებზე - კვირიკაშვილის მოხსენება ეუთოს მინისტერიალზე

პოლიტიკა - 10:06, 04 Dec, 2015

2236

საქართველოს ვიცე-პრემიერმა, საგარეო საქმეთა მინისტრმა, გიორგი კვირიკაშვილმა 2015 წლის 3-4 დეკემბერს ბელგრადში, ეუთო-ს 22-ე მინისტერიალში მიიღო მონაწილეობა.

პლენარულ სესიაზე, სიტყვით გამოსვლისას კვირიკაშვილმა ეუთო-ს სივრცეში არსებულ გამოწვევებზე და საქართველოს ოკუპირებულ რეგიონებში უსაფრთხოებისა და ადამიანის უფლებების კუთხით არსებულ მძიმე ვითარებაზე ისაუბრა. ხაზი გაუსვა იმას თუ რაოდენ მნიშვნელოვანია ამ ტერიტორიებზე საერთაშორისო მონიტორინგის მექანიზმის არსებობა. ამასთანავე საგარეო უწყების ხელმძღვანელმა ყურადღება გაამახვილა რუსეთის ფედერაციის მიერ საერთაშორისო სამართლის ძირითადი პრინციპების უგულველყოფაზე.

"კონფლიქტის ზონებში მცხოვრებ მოსახლეობას არ აქვს საშუალება განახორციელოს საკუთარი პოლიტიკური, სოციალური და ეკონომიკური უფლებები. ისინი მოკლებული არიან თავისუფლად გადაადგილების, კერძო საკუთრებისა და რაც მთავარია მშობლიურ ენაზე სწავლის უფლებას. გალის რაიონის 11 დაწყებით სკოლაში ქართულ ენაზე სწავლება აკრძალულია და ჩანაცვლებულია რუსული ენით. შეფასებები განსაკუთრებით საგანგაშოა ოკუპირებულ რეგიონებში საერთაშორისო მონიტორინგის მექანიზმების არარსებობით. ეს გვაიძულებს სასწრაფოდ ვეძიოთ გზები ეუთოს დემოკრატიული ინსტიტუტებისა და ადამიანის უფლებების ოფისის ეროვნული უმცირესობების უმაღლესი კომისარის „საქართველოში კონფლიქტის შედეგად დაზარალებულ რეგიონებში ადამიანთა უფლებების შესახებ“ ანგარიშის შესასრულებლად. გვინდა კიდევ ერთხელ დავადასტუროთ, რომ საქართველოში კრიზისი მშვიდობიანად უნდა მოგვარდეს, ქვეყნის სუვერენიტეტისა და ტერიტორიული მთლიანობის დაცვით. საქართველო ერთგული რჩება რუსეთთან ურთიერთობის ნორმალიზაციისა და კონფლიქტის მშვიდობიანად დარეგულირების გზების. განვაგრძობთ ჟენევის საერთაშორისო დისკუსიებში მონაწილეობას,"-განაცხადა მინისტრმა
საქართველოს საგარეო საქმეთა მინისტრმა აღნიშნა, რომ საქართველოს მთავრობისთვის პრიორიტეტულია სტრატეგია, რომელიც აფხაზებსა და ქართველებს შორის, ასევე აფხაზებსა და ოსებს შორის ნდობის აღდგენას ემსახურება.