უშიშროების საბჭოს სხდომას პრემიერ-მინისტრი არ დაესწრება

პოლიტიკა - 09:52, 04 Dec, 2015

1374

პრემიერ-მინისტრი ირაკლი ღარიბაშვილი, პრეზიდენტის ადმინისტრაციაში დღეს ჩანიშნულ ეროვნული უშიშროების საბჭოს სხდომას არ დაესწრება. ინფორმაცია ამის შესახებ პრემიერის ადმინისტრაციაში დაადასტურეს.

პრეზიდენტის ადმინისტრაციაში დღეს, 16:00 საათზე , საქართველოს ეროვნული უშიშროების საბჭოს სხდომა გაიმართება.
უშიშროების საბჭოს სხდომის მთავარი თემა არსებული და გაზრდილი რისკებიდან გამომდინარე თავდაცვის ორგანიზებასთან დაკავშირებული ღონისძიებები იქნება.
ცნობილია, რომ შეტყობინება უშიშროების საბჭოს ყველა მუდმივ წევრს გაეგზავნა, თუმცა მათი მხრიდან დასწრების დადასტურებას პროცედურა არ ითვალისწინებს.
ქვეყანაში არყოფნის გამო სხდომას საგარეო უწყების ხელმძღვანელი გიორგი კვირიკაშვილი და საქართველოს პარლამენტის საგარეო ურთიერთობათა კომიტეტის თავმჯდომარე თედო ჯაფარიძე ვერ დაესწრებიან.

შეგახსენებთ იმასაც, რომ ეროვნული უშიშროების საბჭოს მუდმივი წევრები არიან: პრემიერ-მინისტრი, პარლამენტის თავმჯდომარე, საგარეო საქმეთა მინისტრი, თავდაცვის მინისტრი, შს მინისტრი, პარლამენტის თავდაცვისა და უშიშროების კომიტეტის თავმჯდომარე, პარლამენტის საგარეო ურთიერთობათა კომიტეტის თავმჯდომარე, სახელმწიფო უსაფრთხოების სამსახურის უფროსი, პრეზიდენტის თანაშემწე ეროვნული უშიშროების საკითხებში _ ეროვნული უშიშროების საბჭოს მდივანი და შეიარაღებული ძალების გენერალური შტაბის უფროსი.

ზუსტი ინფორმაცია, ვინ დაესწრება უშშროების საბჭოს სხდომას ჯერ-ჯერობით უცნობია.