„რუსთავის წყალისათვის“ დადგენილ ტარიფში ყველა გონივრული ხარჯი გათვალისწინებულია

„რუსთავის წყალისათვის“ დადგენილ ტარიფში ყველა გონივრული ხარჯი გათვალისწინებულია - სემეკი

პოლიტიკა - 17:19, 02 Dec, 2015

1250

საქართველოს ენერგეტიკისა და წყალმომარაგების მარეგულირებელი ეროვნული კომისია (სემეკ) შპს „რუსთავის წყალისათვის“ დადგენილი ტარიფის შესახებ მედიით გავრცელებულ ინფორმაციას ეხმაურება.

„წყალმომარაგების ტარიფების დადგენის მეთოდოლოგიის“ საფუძველზე, 2015 წლის 26 ნოებერს შპს „რუსთავის წყალისათვის“ წყალმომარაგების ტარიფებში კომისიამ წინასწარ ასახა კომპანიის მიერ განსახორციელებელი საინვესტიციო ხარჯები, რათა კომპანიას უზრუნველეყო წყალმომარაგების ინფრასტრუქტურის სრული რეაბილიტაცია. გათვალისწინებული საინვესტიციო გეგმის შესაბამისად, შპს „რუსთავის წყალი“ ვალდებულია 2016 წლის განმავლობაში განახორციელოს 1 685 169 ლარის ინვესტიცია (დღს-გ გარეშე) და უზრუნველყოს მომხმარებელთა უსაფრთხო, საიმედო და უწყვეტი წყალმომარაგება.

კომისიამ შპს „რუსთავის წყალისათვის“ დადგენილ წყალმომარაგების ტარიფებში, საინვესტიციო გეგმასთან ერთად, გაითვალისწინა ყველა სხვა გონივრული ხარჯი, რაც უზრუნველყოფს კომპანიის მიერ სალიცენზიო პირობებით ნაკისრი ვალდებულებების შეუფერხებელ განხორციელებას, პირველ რიგში, მომხმარებელთა ხარისხიან მომსახურებას. კომპანიის მიერ სალიცენზიო ვალდებულებების შეუსრულებლობა განხილული იქნება სალიცენზიო პირობების დარღვევად. პროცესს მკაცრ მონიტორინგს გაუწევს კომისია და კომპანიის მიერ სალიცენზიო პირობების დარღვევის შემთხვევაში, იმოქმედებს კანონმდებლობის შესაბამისად.