"მთავრობა ადექვატურ პასუხს მიიღებს"- ოპოზიცია ხელისუფლებას ეკონომიკურ პოლიტიკას უწუნებს

პოლიტიკა - 23:21, 01 Dec, 2015

1244

ხელისუფლება და ოპოზიცია ბუუჯეტზე ვერ თანხმდებიან. ჯანდაცვის კომიტეტის თავმჯდომარე, დიმიტრი ხუნდაძე, ბიუჯეტზე საუბრისას ადასტურებს, რომ შრომის ანაზღაურება იზრდება, მაგრამ, მისი თქმით, ეს ზრდა არ არის მაღალჩინოსნების ხელფასების ზრდასთან დაკავშირებული, როგორც ამაზე ოპოზიცია საუბრობს.

„შრომის ანაზღაურება მომავალ წელს ეხება, მაგალითად, სამხედრო მოსამსახურეებს. მათ ეზრდებათ ანაზღაურა, კონტრაქტორებზეა აქ საუბარი. სამაშველო სამსახურის ხელფასები 41 მილიონი ლარით იზრდება; პოლიციელების ხელფასები; ასევე მოსამართლეთა ანაზღაურება და არსად არ არის მაღალჩინოსნების ხელფასების მატებაზე საუბარი,“ - აცხადებს დიმიტრი ხუნდაძე.

ახალი პოლიტიკური ცენტრის ლიდერი ზურაბ ჯაფარიძე ხელისუფლებას ეკონომიკურ პოლიტიკას უწუნებს.

დეპუტატის თქმით, "ეკონომიკა არ იზრდება და ხარჯები იზრდება კატასტროფულად".

„სოციალური ბიუჯეტი არ არსებობს. ბიუჯეტი ან არის კარგი, ან ცუდი. ეს არის მოტყუება ადამიანებისა. სიტყვებით ატყუებს ხელისუფლება. რაც ქართული ოცნების ხელისუფლებამ მოიტანა, არის ის, რომ ვითომ არიან სოციალურად მოტივირებულები, რეალურად კი არის ლარის დევალვაცია, ინფლაციის კატასტროფული მაჩვენებელი, რამაც მოიტანა ცხოვრების გაძვირება,“ - აცხადებს ზურაბ ჯაფარიძე.

"ათი დოლარითაც არ იზრდება პენსია, მთავრობა ადექვატურ პასუხს მიიღებს," - ეს განცხადება თოქ-შოუ არჩევანში დეპუტატმა ზურაბ აბაშიძემ გააკეთა.

თავისუფალი დემოკრატების წევრი ფიქრობს, რომ მთავრობა არასწორად მუშაობს.

"რაც არ უნდა ამ რიცხვებზე ვისაუბროთ, საზოგადოებას აინტერესებს, რას იზამს დღევანდელი მთავრობა და გამოწვევებს როგორ გაუმკლავდება. თუმცა, დღევანდელი მთავრობა ამას ვერ ახერხებს. დღეს მთავარი პრობლემა არის ის, რომ ეკონომიკა არ ვითარდება. წინსვლა არ არსებობს. უამრავი პრობლემები სწორედ აქედან არის. ათი დოლარითაც არ იზრდება პენსია და ეს მატებაც თვეების შემდეგ იქნება. 7 თვის შემდეგ თუ რა იქნება, არავინ არ იცის. ყველა ამ ქვეყნის შვილები ვართ და გვინდა, ქვეყანა წინ წავიდეს. მართვაში არის პრობლემები," - განაცხადა ზურაბ აბაშიძემ.