საარჩევნო კოდექსში შესატან ცვლილებას კონსტიტუციონალისტები არაკონსტიტუციურს და ფორმალურს უწოდებენ. როგორც ვახუშტი მენაბდე ამბობს, ოლქების დაყოფა ხელოვნურად მოხდა. მისი განცხადებით, ცვლილებას კანონთან საერთო არ აქვს.

„პარლამენტს აღებული ჰქონდა ვალდებულება, მოემზადებინა იმგვარი კონცეფცია, რომლის მიხედვითაც ოლქები მეტ-ნაკლებად იქნებოდა თანაბარი. ამ რეფორმით ჩვენ ვხედავთ არათუ 10-15%-იან სხვაობას, არამედ არამედ აქ არის 60-70-80-100%-იანი სხვაობები. ვერაფერი ვერ გაამართლებს ამ სხვაობებს, რომელიც არა გამონაკლისი, არამედ არის ტენდენცია იმ რეფორმის მიხედვით, რომელსაც უმრავლესობა გვთავაზობს“, - ამბობს მენაბდე.

კონსტიტუციონალისტი დავით ზედელაშვილი ამბობს, რომ ხელისუფლებამ საკონსტიტუციო სასამართლოს გადაწყვეტილება ფორმალურად შეასრულა.

„მთავრობა ცდილობს აირჩიოს მისთვის ყველაზე კომფორტული გზა, რომელიც მხოლოდ გარეგნულ ელფერს შეუქმნის, რომ თითქოს ფორმალურად შეასრულა საკონსტიტუციო სასამართლოს გადაწყვეტილება, თუმცა თუ შევხედავთ დევიაციებს ოლქებს შორის საეჭვოა რამდენად ჯდება იმ სტანდარტებში, რომელიც საკონსტიტუციო სასამართლომ დაადგინა“, - განაცხადა დავით ზედელაშვილმა.

საარჩევნო კოდექსში შესატანი ცვლილებების პროექტი პარლამენტში ინიცირებულია. პროექტის მიხედვით, თბილისში 10 მაჟორიტარული ოლქის ნაცვლად, 18 მაჟორიტარული ოლქი იქნება.

საქართველოს დანარჩენ რაიონებში მუნიციპალიტეტების გაერთიანების ან გაყოფის გზით 42 მაჟორიტარული საარჩევნო ოლქი შეიქმნება.

პროექტის მიხედვით, 13 მუნიციპალიტეტის - საგარეჯოს, გურჯაანის, ახმეტის, ხაშურის, ახალქალაქის, ნინოწმინდის, მესტიის, საჩხერის, ჭიათურის, წყალტუბოს, სენაკის, ზუგდიდისა და ფოთის მუნიციპალიტეტების საზღვრები თანხვედრაში მაჟორიტარული საარჩევნო ოლქის საზღვრებთან იქნება.