საქართველოს პრეზიდენტმა გიორგი მარგველაშვილმა მოწმეთა დაკითხვის წესთან დაკავშირებით პარლამენტს თხოვნით მიმართა.

პრეზიდენტის თხოვნა პარლამენტის ბიუროს სხდომაზე დეპუტატებს პრეზიდენტის საპარლამენტო მდივანმა გირგი კვერენჩხილაძემ გააცნო.

კვერენჩხილაძის განცხადებით, საქართველოს პრეზიდენტისა და პარლამენტის ინსტიტუციების კოლეგიალური და ეფექტური თანამშრომლობიდან გამომდინარე, მოგმართავთ თხოვნით, რომ ამ კანონპროექტის განხილვა და მიღება იმგვარად განხორციელდეს, რომ პრეზიდენტს მიეცეს კონსტიტუციით დადგენილი ვადების და პროცედურების სრულყოფილად გამოყენების საშუალება.

ცნობილია, რომ საქართველოს პარლემენტმა მოწმის დაკითხვის ახალი წესის ამოქმედება 2013 წელს, 2 წლით, 2015 წლის 31 დეკემბრამდე გადადო.

2013 წლის დეკემბერში საქართველოს პარლამენტის თავმჯდომარე დავით უსუფაშვილი აცხადებდა, რომ მოწმის დაკითხვის ინსტიტუტის ამოქმედების გადავადება არ ნიშნავდა იმას, რომ რომ ეს პროცესი უსასრულოდ გაგრძელდებოდა.

დავით უსუფაშვილი ამბობდა, რომ უახლოეს თვეებში მთავრობასთან ერთად მიიღებდა გადაწყვეტილებას - ან დასაბუთებულად მოხდებოდა უარის თქმა აღნიშნული ინსტიტუტის ამოქმედებაზე, ან და კონკრეტულად გაიწერებოდა ის ნაბიჯები, რომლითაც მოწმეთა სასამართლოში დაკითხვის ინსტიტუტი ცხოვრებაში დაინერგებოდა. მისი თქმით, დროის გაჭიმვა უსაშველოდ აღარ მოხდება.

2013 წლის შემაჯამებელი გამოსვლიდან 1 წლისა და 5 თვის შემდეგ, პარლემენტის თავმჯდომარე მოწმეთა დაკითხვის ახალი წესის ამოქმედების შესახებ ამბობს, რომ მოწმის დაკითხვის ინსტიტუტის ამოქმედება იმაზე ადრე უნდა მოხდეს, ვიდრე ეს კანონშია დათქმული - ანუ 2016 წლის 1 იანვრამდე.