საარჩევნო კოდექსში შესატან ცვლილებებს, რომლის ინიცირებაც პარლამენტში დღეს უნდა მოხდეს ოპოზიცია მხარს არ დაუჭერს.

„ნაციონალური მოძრაობის“ წევრი აკაკი ბობოხიძე ცვლილებებს მარაზმს უწოდებს და ამბობს, რომ ცვლილების შემდეგ გაუგებარი საარჩევნო სისტემა მიიღება.

„ეს არის კიდევ ერთი მარაზმი, რომელშიც „ქართული ოცნებას“ შეჰყავს საქართველოს მოსახლეობა მხოლოდ ერთი პრინციპით, რომ საარჩევნო ოლქში ამომრჩეველთა რაოდენობა 50 ათასი იყოს. გაუგებრად შეაწყვილეს და გაართიანეს საქართველოს ტერიტორიული ერთეულები. გაუგებარია რატომ უნდა იყოს ერთად ხარაგაული და ბაღდათი და ამას დამატებული ზესტაფონის სოფლები. წარმომიდგენია რამდენად გართულდება ზესტაფონის მაცხოვრებლებისთვის დეპუტატებთან ურთიერთობა. ისინი ადმინისტრაციული თვალსაზრისით ერთ ოლქში იქნებიან, ხოლო დეპუტატის ბიუროში ან ბაღდათში ან ხარაგაულში სიარული მოუწევთ. ასე, რომ ეს არის გაუგებარი სისტემა“, - ამბობს ბობოხიძე.

„თავისუფალი დემოკრატები“ საარჩევნო სისტემაში განსახორციელებელ ცვლილებებს სასაცილოს უწოდებენ.

"იქნება ოლქი, მაგალითად, ბაღდათი ხარაგაულის პლიუს სოფელი პირველი სვირი და მეორე სვირი. ასევე იქნება ოლქი ნახევარი სამტრედია-ვანი, ნახევარი სამტრედია-ხონი. სასაცილოა, სატირალი რომ არ იყოს. ეს იმიტომ, რომ მათ ეს თბილი სავარძლები შეინარჩუნონ. გაჭრილი ვაშლივით ჰგავს "ქართული ოცნების" ნამოქმედარი „ნაციონალური მოძრაობისას", - აცხადებს გიორგი ცაგარეიშვილი.

პარლამენტის ბიუროს დღეს საარჩევნო კოდექსში შესატანი ცვლილებების პროექტი წარედგინება. პროექტი 73 მაჟორიტარული ოლქის დაყოფის ახალი სქემის შემოღებას ითვალისწინებს, რომელიც საკონსტიტუციო სასამართლოს გადაწყვეტილებას უნდა შეესაბამებოდეს.

მმართველი გუნდის განცხადებით, შემუშავებული მოდელით მაჟორიტარულ ოლქებს შორის ამორჩეველთა უთანაბრობა მინიმუმამდე იქნება დაყვანილი.