„დემოკრატიულ მოძრაობაში“ საგანგაშოს უწოდებენ უმრავლესობის დეპუტატის ლევან ბერძენიშვილის განცხადებას, სადაც საუბარია საქართველოს ნატოში გაწევრიანებაზე ნატოს წესდების მეხუთე პუნქტის გავრცელების გარეშე.

ამის შესახებ დღეს გამართულ ბრიფინგზე პარტიის წევრმა გიგლა ბარამიძემ განაცხადა.

ნინო ბურჯანაძის პარტია აღნიშნული განცხადების გამო პრემიერს და პარლამენტის თავმჯდომარეს ახსნა-განმარტებას სთხოვს.

"რა ვალდებულებები გაქვთ ბატონებო აღებული ასეთი დასავლეთთან და რით ვეღარ დაასრულეთ მათი შესრულება, რომ მზად ხართ საბოლოოდ დააქციოთ და გაწიროთ ქვეყანა?!საზოგადოებისათვის დიდი ხანია ცნობილია რომ "რესპუბლიკური პარტია", მზადაა ქვეყნის ტერიტორიული მთლიანობის ფასად, აფხაზეთისა და ცხინვალის რეგიონის გარეშეც დასთანხმდეს საქართველოს ნატო-ში გაწევრიანებას, გუშინ კი გაიჟღერა კიდევ ერთმა საგანგაშო და ანტისახელმწიფოებრივმა პოზიციამ. საქართველოს ნატო-ში გაწევრიანების სურვილი პირდაპირ უკავშირდებოდა უსაფრთხოების გარანტიების მიღებას ამ ორგანიზაციისაგან და არა იმას, ჩვენი ჯარისკაცები იღუპებოდნენ ნატო-ს სამხედრო მისიებში, საქართველოში განთავსდეს ნატო-ს ბაზები და რაკეტსაწინააღმდეგო სისტემები, ხოლო სამხედრო დაპირისპირების შემთხვევაში ნატო არ იყოს ვალდებული დაგვიცვას და ჩვენ აღმოვჩნდეთ მარტონი, უთანასწორო ბრძოლაში, ისევე როგორც 2008 წლის აგვისტოს ომის დროს“, - განაცხადა ბარამიძემ.

ლევან ბერძენიშვილს მიაჩნია, რომ საქართველოს შეუძლია მეხუთე მუხლის გარეშეც გახდეს ნატოს წევრი ქვეყანა.

„ანუ ნატო არ იყოს ვალდებული დაიცვას საქართველო რუსეთთან კონფლიქტის დროს. ასე მოხდა გერმანიის შეყვანა NATO-ში. ხუთოსნები ვართ NATO-ს მიმართულებით“, - განაცხადა გუშინ ბერძენიშვილმა.