თბილისის მერი დავით ნარმანია „თბილისის მეწარმეობის ხელშეწყობის ცენტრის“ მუნიციპალური პროგრამის პრეზენტაციას დაესწრო - სახელწოდებით „შემომყვანი ტურიზმის დარგის განვითარება“.

აღნიშნული პროგრამა თბილისის საკრებულომ მიმდინარე წლის 30 ოქტომბერს დაამტკიცა. პროგრამის მიზანია თბილისში რეგისტრირებული და მოქმედი ტურისტული კომპანიების და დარგში შემავალი სხვა სუბიექტების გაძლიერება, მათი სიმძლავრეების, დატვირთულობის, უნარების, შემოსავლების, ეფექტიანობისა და მდგრადობის ზრდის ხელშეწყობა, ასევე, თბილისის, როგორც ტურიზმისათვის მიმზიდველი დანიშნულების ადგილის პოზიციონირება, პოპულარიზაცია საზღვარგარეთის ბაზრებზე და დედაქალაქში ტურისტული ინფრასტრუქტურის გაუმჯობესების მხარდაჭერა.

აღნიშნული პროგრამა ხელს შეუწყობს თბილისში ტურიზმის დარგის მდგრად განვითარებას. პროგრამით გათვალისწინებული მხარდაჭერა გულისხმობს: თბილისის მარკეტინგის ორგანიზაციის შექმნას; სარეკლამო-გაცნობითი ტურების ორგანიზებას; დარგის პერსონალის გადამზადებას; ტურისტული ინფრასტრუქტურის გაუმჯობესებას; რეგულარული საერთაშორისო ტურისტული ღონისძიებების დამკვიდრებას.

პრეზენტაციას ესწრებოდნენ ტურიზმის სფეროს წარმომადგენლები, თბილისის მერიისა და საკრებულოს, საქართველოს ტურიზმის ეროვნული ადმინისტრაციის, დიპლომატიური კორპუსისა და უცხოური დონორი ორგანიზაციების წარმომადგენლები.