ევროკომისარი იოჰანეს ჰანი დარწმუნებულია, რომ ვიზის ლიბერალიზაციის პროცესის ანგარიშის მიმართულებით პასუხი დადებითი იქნება.

ამის შესახებ ევროკომისარმა ევროპული სამეზობლო პოლიტიკისა და გაფართოების მოლაპარაკებათა საკითხებში იოჰანეს ჰანმა საქართველოს პრემიერ-მინისტრთან ერთად გაკეთებულ განცხადებაში აღნიშნა.

ევროკომისარმა ხაზი გაუსვა იმ რეფორმებს, რომელიც საქართველომ ასოცირების ხელშეკრულებით გაწერილი ვალდებულებების შესრულების მიმართულებით განახორციელა.

„ამ მხრივ მიღწეული პროგრესი საქართველო-ევროკავშირის ასოცირების საბჭოს სხდომაზე აღინიშნა, რომელიც გასულ კვირას ბრიუსელში გაიმართა. ჩვენ მზადყოფნა გამოვთქვით, გავაღრმავოთ საქართველოს პოლიტიკური ასოცირება და ეკონომიკური ინტეგრაცია ევროკავშირში. ქართული პროდუქციის ექსპორტი ევროკავშირში გაიზარდა. საქართველოში ასევე იზრდება პირდაპირი უცხოური ინვესტიციები, რაც ვფიქრობთ პოზიტიური სიგნალია ინვესტორებისთვის. არის ასეთი გამოთქმა - ფულს სჭირდება სტაბილურობა. თუ ქვეყანაში ფული შედის, ეს იმის ნიშანია, რომ იქ სტაბილურობაა“, - განაცხადა იოჰანეს ჰანმა.

ევროკომისარმა ასევე დადებითად შეაფასა სასამართლო და მართლმსაჯულების სისტემაში განხორციელებული რეფორმები და აღნიშნა, რომ ევროკავშირი ამ მიმართულებით საქართველოს მხარდაჭერას განაგრძობს.