უმრავლესობაში არ იზიარებენ „ნაციონალური მოძრაობის“ განცხადებას, რომ პენსიის ზრდა მათი ინიციატივის გაჟღერების შემდეგ მოხდა.

ზურაბ ტყემალაძის თქმით, პრემიერმა გაცილებით ადრე მისცა დავალება მთავრობის და უმრავლესობის წარმომადგენლებს, რომ პენსიის ზრდისთვის საშუალება მოძებნილიყო.

„ამ საკითხზე ვიმსჯელეთ პოლიტსაბჭოს სხდომაზეც. პრემიერის პირდაპირი დავალება იყო, რომ მოძებნილიყო საშუალება, თუ როგორ შეიძლებოდა პენსიის ზრდა. ეს მანამდე სანამ „ნაციონალები“ ამ ინიციატივას გააჟღერებენ. რისი საშუალებაც მოიძებნა, ეს არის“, - აღნიშნა ტყემალაძემ.

თანაგუნდელის პოზიციას იზიარებს გუგული მაღრაძე და ამბობს, რომ ხელისუფლება მოსახლეობის მოთხოვნებს შესაძლებლობების ფარგლებში პასუხობს.

„ოპოზიციამ ყოველთვის შეიძლება მეტი და მეტი მოითხოვოს, მაგრამ ხელისუფლებამ უნდა ვუპასუხოთ იმით, რომ რა შესაძლებლობებიც არსებობს, იმ შესაძლებლობებში უპასუხოს მოსახლეობის მოთხოვნებს. არამგონია, რომელიმე ხელისუფლებას უნდოდეს, რომ მოსახლეობას მდგომარეობა არ გაუუმჯობესოს“, - განაცხადა მაღრაძემ.