თუ მთავარ პროკურორად ამირჩევთ, უწყება უფრო გამჭირვალე იქნება

თუ მთავარ პროკურორად ამირჩევთ, უწყება უფრო გამჭირვალე იქნება - შოთაძე

პოლიტიკა - 12:21, 26 Nov, 2015

1435

მთავარი პროკურორობის კანდიდატი ირაკლი შოთაძე პირობას დებს, რომ პარლამენტის მხარდაჭერისა და მისი პროკურორად დანიშვნის შემთხვევაში უწყება უფრო გამჭირვალე და დამოუკიდებელი იქნება.

ამის შესახებ შოთაძემ კომიტეტების გაერთიანებულ სხდომაზე განაცხადა.

შოთაძე პროკურატურაში მუშაობის პერიოდსაც შეეხო. მთავარი პროკურორობის კანდიდატის თქმით, მისთვის კარგად არის ცნობილი ის საჭიროებები და პრობლემატური საკითხები, რის წინაშეც პროკურორები და გამომძიებლები დგანან.

„თუ საქართველოს მთავარ პროკურორად ამირჩევთ პროკურატურა გაცილებით უფრო გამჭირვალე, დამოუკიდებელი და განვითარებული სტრუქტურა გახდება, რომელსაც ექნება სრული მხარდაჭერა როგორც ქართული საზოგადოების, ასევე საერთაშორისო ორგანიზაციების მხრიდან. ეს იქნება დიდი პატივი და ამასთან ერთად შანსი იმისა, რომ შევძლო ჩემი ხედვების ცხოვრებაში გატარება პროკურატურის განვითარების და დამოუკიდებლობის გამყარების მიმართულებით. 2006 წლის 3 აპრილს, როცა პროკურატურაში სტაჟიორად მუშაობა დავიწყე ვერ წარმომედგინა, რომ ათი წლის შემდეგ, საქართველოს პარლამენტის წინაშე მთავარი პროკურორის კანდიდატად წარდგომა მომიწევდა. ჩემთვის ძალიან კარგად არის ცნობილი ის პრობლემატური საკითხები, რომლის წინაშეც პროკურორები და გამომძიებლები დგანან", - განაცხადა ირაკლი შოთაძემ.