,,პრობლემის უარყოფა, პრობლემის შეცვლა და გადაბრალება“ - რატომ დაეცა ,,ქართული ოცნების“ რეიტინგი

პოლიტიკა - 16:29, 25 Nov, 2015

1525

,,ისინი მუშაობენ ზუსტად იგივე მეთოდით, როგორც მუშაობს RussiaToday - კრემლის პროპაგანდის რუპორი არხი მთელ მსოფლიოში“ - თავდაცვის ყოფილი მინისტრი დიმიტრი შაშკინი ,,ქართული ოცნების“ რეიტინგის სწრაფ ვარდნაზე სუბრობს. შაშკინი ,,ნიუპოსტთან“ აცხადებს, რომ ,,ქართულმა ოცნებამ“ საზოგადოებასთან ურთიერთობების ყველა კანონი დაარღვია.

,,ქართული ოცნების“ რეიტინგი რადიკალურად დაეცა ბუნებრივია იმის გამო, რომ არ იყო შესრულებული ის დანაპირები, რომელიც ხალხმა მიიღო წინასაარჩევნო პროცესში. რამდენიც არ უნდა ილაპარაკონ ქართული ოცნების მხარდამჭერებმა, რომ შესრულებულია, ყველა ცხოვრობს საქართველოში და ხედავენ რამდენად ასეა“ - აცხადებს შაშკინი და განმარტავს თუ რატომ დაეცა ასე სწრაფად და რატომ არ გამოიჩინა ხალხმა ცოტა მეტი მოთმინება ახალი ხელისუფლების მიმართ.

,,ეს მოხდა ზუსტად იმის გამო, რომ ქართულ ოცნებას არ ესმის არსი საზოგადოებასთან ურთიერთობების. ისინი მოვიდნენ ხელისუფლებაში და პირველი წლების განმავლობაში გამუდმებით საუბრობდნენ, რომ ,,პიარი“ ეს არის ცუდი სიტყვა. პიარი მოგეხსენებათ არის საზოგადოებრასთან ურთიერთობები. რადგან მათ ჩათვალეს, რომ ეს არის ცუდი, მათ დაარღვიეს საზოგადოებასთან ურთიერთობის ყველა კანონი. პროფესიონალური თვალით თუ დავაკვირდებით, ვნახავთ რომ ისინი მუშაობენ ზუსტად ისე, იგივე მეთოდით, როგორც მუშაობს RussiaToday - ეს არის კრემლის პროპაგანდის რუპორი არხი მთელ მსოფლიოში. RussiaToday დგას სამ ვეშაპზე - პირველი ეს არის პრობლემის უაროფა. რამენიც არ უნდა უმტკიცო, რომ ამ კუთხით პრობლემებია, მაინც მტკიცედ ამტკიცებენ, რომ არ არის. მეორე ეს არის პრობლემის შეცვლა - როცა ეუბნები, რომ აქ გვაქვს პრობლემა, ისინი გეუბნებიან, რომ სხვა არის, რომელიც რეალურად არც გაწუხებს. და მესამე - გადაბრალება. ანუ პრობლემა ჩვენი კი არა, ვიღაც სხვისი ბრალია. ზუსტად ასე მუშაობს ქართული ოცნება. არ გვიღებენ ნატოში ეს სხვისი ბრალია, ევროპა გვაკრიტიკებს თუ ქვეყნის შიგნით სოციალური პრობლემებია - ესეც სხვისი ბრალია. ეს არის სამი ძირითადი მეთოდი - პრობლემის უარყოფა, პრობლემის შეცვლა და გადაბრალება. ამის გამოყენება ყოველთვის მიგიყვანს იმ შედეგამდე, რაც დღეს საქართველოში სახეზეა“ - აცხადებს შაშკინი.