"ის, რაც გუშინ მოხდა რუსეთის პოლიტიკის შედეგია" - ედგარ რინკევიჩი თურქეთის ინციდენტზე

პოლიტიკა - 12:21, 25 Nov, 2015

1578

ლატვიის საგარეო საქმეთა მინისტრი ედგარს რინკევიჩი რუსული სამხედრო თვითმფრინავის ჩამოგდების ფაქტს რუსული პოლიტიკის შედეგს უკავშირებს.

როგორც „კურიერთან“ საუბრისას რინკევიჩმა განაცხადა, თურქეთისგან რუსეთმა საჰაერო სივრცის დარღვევასთან დაკავშირებით გაფრთხილება რამდენჯერმე მიიღო.

„ის, რაც გუშინ მოხდა რუსეთის პოლიტიკის შედეგია, რომელსაც ის სირიაში ატარებს. რუსეთს არ აქვს კოორდინაცია კოალიციის სხვა წევრებთან. თურქეთი გამუდმებით მოუწოდებდა მოსკოვს თავი შეეკავებინა თურქეთის საჰაერო სივრცის დარღვევისგან. ნებისმიერ ქვეყანას აქვს უფლება დაიცვას საკუთარი ტერიტორია. თურქეთმა ეს უფლება სრულიად კანონიერად გამოიყენა. ინციდენტის შემდეგ ნატოს შტაბ-ბინაში გაიმართა საგანგებო სხდომა და ყველა წევრმა ქვეყანამ თურქეთს სოლიდარობა გამოუცხადა. ახლა აუცილებელია, რომ თურქეთმა და რუსეთმა ერთად იმუშაონ სიტუაციის დეესკალაციაზე. თურქეთს არ მოუთხოვია მუხლის ამოქმედება, რომლის თანახმადაც ნატოს წევრ ქვეყანას შეუძლია მოითხოვოს დანარჩენი წევრი ქვეყნებისგან ჩართვა უსაფრთხოების უზრუნველყოფის პროცესში. ძალიან რთულია იმის პროგნოზირება, თუ როგორ განვითარდება მოვლენები. თუმცა მნიშვნელოვანია, რომ შევინარჩუნოთ სიმშვიდე და არ ავყვეთ ფანტაზიებს აპოკალიპტური სცენარების შესახებ, თითქოს გვიახლოვდება ბირთვული ომი“, - განაცხადა რინკევიჩმა.