საკრებულოს ფრაქცია „ნაციონალური მოძრაობის“ თავმჯდომარე ირაკლი აბესაძე თბილისის 2016 წლის ბიუჯეტის პროექტს კორუფციულს უწოდებს.

მისი თქმით, ბიუჯეტი გამიზნულია იმისთვის, რომ მილიონობით ლარი კვლავ მაღალჩინოსნებზე დაიხარჯოს.

ოპოზიცია ასევე უარყოფითად აფასებს ბიოტუალეტებისთვის 100 ათასი ლარის დახარჯვას, ასევე რკინის ჯებირებისთვის მილიონი ლარის გამოყოფას.

„ყველა მიმართულებით დავით ნარმანიას ჭირდება ბიუჯეტის გადამუშავება იმისთვის, რომ ეს კორუფციული დოკუმენტი, რომელიც კვლავ გამიზნული იყო იმისთვის, რომ ასეულობით მილიონი ლარი დახარჯულიყო, ხოლო საზოგადოებას კონკრეტული შედეგი არ ენახა და მხოლოდ ჩინოვნიკებს მოეთბოთ ამაზე ხელი. ასეთი დოკუმენტის დამტკიცება 2016 წლისთვის იქნება ძალიან დიდი მავნებლობა,“ - განაცხადა ირაკლი აბესაძემ.

თბილისის 2016 წლის ბიუჯეტთან დაკავშირებით შენიშვნები აქვს საკრებულოს უმრავლესობასაც. თბილისის მერიას საკრებულოდან ბიუჯეტი უკან რამდენიმე დღის წინ დაუბრუნდა. მერიამ შესრწორებული დოკუმენტი 10 დეკემბრამდე უნდა გადააგზავნოს საკრებულოში.