,,პატრიორტთა ალიანსმა” შიმშილობა შეწყვიტა - ინაშვილს 2016-ში სამართლიანი არჩევნების იმედი აქვს

პოლიტიკა - 20:55, 24 Nov, 2015

899

,,პატრიორტთა ალიანსმა” შიმშილობა შეწყვიტა. გარადწყვეტილება ირმა ინაშვილმა პარლამენტის ვიცე-სპიკერთან შეხვედრის შემდეგ მიიღო. შეხვედრა დაახლოებით საათნახევარი გაგრძელდა. „ვფიქრობ, მივაღწიეთ იმ შეთანხმებას, რომ მოშიმშილეები შიმშილობას შეწყვეტენ“, - განუცხადა ჟურნალისტებს მანანა კობახიძემ.

ინაშვილის თქმით, თუ მისი მოთხოვნა არ დაკმაყოფილდება „პატრიოტთა ალიანსი“ შიმშილობას და საპროტესტო აქციებს გაზაფხულიდან განაახლებს.

„ჩვენი მთავარი მოთხოვნა უკავშირდებოდა და უკავშირდება ქვეყანაში საარჩევნო გარემოს შეცვლას. ჩვენ გვაქვს მოლოდინი, რომ ხელისუფლება აღარ გაიმეორებს საგარეჯოს არჩევნების მაგალითს და 2016 წლის არჩევნები ჩატარდება თავისუფალ გარემოში, წინააღმდეგ შემთხვევაში ჩვენ ვერ აღვკვეთთ ვერც შიმშილობას, ვერც საპროტესტო აქციებს, რაც გაზაფხულიდან აუცილებლად დაიწყება“, - აღნიშნა ირმა ინაშვილმა.

,,პატრიოტთა ალიანსის“ ლიდერი ამ ეტაპზე აქციების ჩატარებას არ გეგმავს. ,,დღეს ჩვენ ვნახეთ, რომ შედგა პირველი შეხვედრა, ანუ იყო რეაგირება, შესაბამისად ვიმსჯელებთ იმაზე, ჩავატაროთ თუ არა ეს აქცია. ახლა ჩვენთვის მთავარი და მნიშვნელოვანია, დაიწყოს მუშაობა ამ ცვლილებების განხორციელებაზე, აქციების ორგანიზება პრობლემა არ არის მაშინ როცა ამის საჭიროებაა“, - განაცხადა ირმა ინაშვილმა.